Keń dala áýeni: Majarstanda qazaq mýzykasy shyrqaldy
Býdapeshte Dına Nurpeıisova atyndaǵy qazaq halyq aspaptary akademııalyq orkestriniń kontserti ótti. Táýelsizdik kúnine oraılastyrylǵan ansambldiń ónerin Atyraý oblysy ákimdiginiń qoldaýymen Qazaqstannyń Majarstandaǵy Elshiligi uıymdastyrdy, dep habarlaıdy Kazinform.
Majarstan mýzyka úıiniń jańa kontsert zalynyń sahnasynda qazaq jáne álem klassıkteriniń uly tulǵalary — Dına Nurpeıisova, Qurmanǵazy, Jaıaý Musa, Ahmet Jubanov, Nurǵısa Tilendıev, Evgenıı Brýsılovskıı, sondaı-aq Iogan Shtraýstyń shyǵarmalary oryndaldy.
Kontserttik baǵdarlamada kórermender qazaq halyq aspaptarynyń dybysyn tyńdap, baı shyǵarmashylyq repertýardy baǵalady.
Orkestrdiń dybysy úlken dınamıkamen erekshelendi, kórermenderdi «Balbyraýyn», «Qorqyt» kompozıtsııalary erekshe qyzyqtyrdy.
Sonymen qatar orkestr áıgili «Adaı» kúıin oryndady.
«Áýen men ándi tyńdaǵanda eń túsiniksiz sezimder paıda boldy. Halyq mýzykasy árqashan kóne zamannan kele jatqan oqıǵalardy beıneleıdi. Kóshpeli halyqtardy dúnıege ákelgen uly dalanyń mýzykalyq murasyn estidik. Qazaq halqy jaratylysynan óte daryndy, mádenıeti baı, ádemi daýysty halyq eken», — dep pikir bildirdi kórermenniń biri.
Sondaı-aq Iogannes Bramstyń «Majar bıleri № 5» kompozıtsııasy kórermen úshin tosynsyı boldy.
Kópshilik ártisterdiń kıiminiń ádemiligine, olardyń emotsııasyna jáne jigerine tań qaldy. Ansambldiń bir jarym saǵatqa sozylǵan óneri eshkimdi beıjaı qaldyrmady.
Kórermender ár qoıylymdy jyly qabyldady.
Kásibı oryndaý, ulttyq kostıýmder, oılastyrylǵan baǵdarlama kópshilikke unady, majar halqy ártisterge ártisterge dý qol shapalaqpen alǵysyn jetkizdi.
