«Keń dala 2» baǵdarlamasy aıasynda SQO dıqandaryna 93 mlrd teńgeden astam nesıe berildi
ASTANA. KAZINFORM - Aýyl sharýashylyǵy mınıstri Aıdarbek Saparov Soltústik Qazaqstan oblysyna jumys sapary barysynda kóktemgi dala jumystary barysymen, sondaı-aq óńdeý jáne mal sharýashylyǵy salalaryndaǵy iri ınvestıtsııalyq jobalardyń tynys-tirshiligimen tanysty.
QR Aýyl sharýashylyǵy mınıstrligi baspasóz qyzmetiniń habarlaýynsha, Aıdarbek Saparov «Servıs Jars» seriktestiginiń tuqym sharýashylyǵynda «Trızo» surypty jumsaq bıdaı egisiniń jaı-kúıin kórdi. Jalpy, kóktemgi egis 6 800 gektar alqapta josparlanǵan, onyń ishinde 4 myń gektardan astamy dándi jáne dándi-burshaqty daqyldarǵa bólingen.
Óńirdegi aýyl sharýashylyǵy qurylymdarynyń basshylarymen ótken kezdesýde ósimdik jáne mal sharýashylyǵyn damytý máseleleri talqylandy.
Aýyl sharýashylyǵy taýaryn óndirýshiler egis naýqanynyń shtattyq rejımde ótip jatqanyn, sharýashylyqtardyń qajetti materıaldyq-tehnıkalyq resýrstarmen tolyq qamtamasyz etilgenin jetkizdi.
-«Vıshnevskoe» seriktestiginiń dırektory Pavel Rafalskıı memlekettik qoldaý sharalarynyń tıimdiligin erekshe aıta kelip: «Egis naýqanyn agrotehnıkalyq turǵydan ońtaıly merzimde aıaqtaýǵa jaqyndadyq. Bul «Keń dala 2» baǵdarlamasy aıasynda erte qarjylandyrý tıimdiliginiń nátıjesi. Dala jumystary bastalǵanǵa deıin tehnıka tolyq daıyndalyp, mıneraldyq tyńaıtqyshtar men arzandatylǵan janar-jaǵarmaı satyp alyndy. Barlyq negizgi daqyldarǵa qajetti kólemde tyńaıtqysh engizildi. Bul bolashaq ónimge de oń áserin tıgizetini sózsiz. Osy baǵyttaǵy júıeli jumys úshin Úkimetke alǵysymyz zor, — dedi ol.
-Búginde agroónerkásip kesheniniń aldynda ósimdik sharýashylyǵy ónimderiniń kólemin arttyrýmen qatar, zamanaýı ári básekege qabiletti mal sharýashylyǵy júıesin qalyptastyrý strategııalyq mindeti tur. Ol úshin jemshóp bazasyn nyǵaıtyp, zamanaýı óńdeý kásiporyndaryn iske qosyp, mal sharýashylyǵy jobalaryn júzege asyrý kerek. Memleket basshysynyń tapsyrmasy boıynsha, bul baǵytta barlyq jaǵdaı jasalǵan, keshendi jospar ázirlenip, kezeń-kezeńimen iske asyrylyp jatyr. Sondyqtan barynsha belsendi qatysyp, memleket tarapynan atqarylyp jatqan múmkindikterdi barynsha tıimdi paıdalanýǵa shaqyramyn, — dedi Aıdarbek Saparov.
Jumys sapary barysynda mınıstr sondaı-aq «Salar Farm» seriktestiginiń jońyshqadan túıirshikter men prestelgen taılamalar óndiretin zaýyt qurylysymen tanysty. Kásiporynnyń jyldyq qýaty 60 myń tonna ónim, al ınvestıtsııa kólemi — 5,5 mlrd teńgeni quraıdy.
Joba Soltústik Qazaqstan oblysynyń tájirıbesin taratý baǵdarlamasy aıasynda qolǵa alynǵan jáne joǵary aqýyzdy jemshópti Qytaıǵa, Ortalyq Azııa elderine, BAÁ men Eýropaǵa eksporttaýǵa baǵyttalǵan.
Sondaı-aq Aıdarbek Saparov «Zenchenko ı K» kásipornynyń kóktemgi dala jumystaryn aralap kórdi. Alqapta keshe «Prerııa» surypty arpa sebý bastaldy.
Jalpy, sharýashylyq 37,9 myń gektardan astam alqapta kóktemgi dala jumystaryn júrgizip jatyr. Qazir 20 myń gektar jerge júrgizilgen, onyń ishinde dándi, maıly, mal azyqtyq daqyldar men kartop bar. Bıylǵy ónim úshin 3,7 myń tonnadan astam mıneraldyq tyńaıtqysh engizilgen.
«Zenchenko ı K» kásiporny zamanaýı aýyl sharýashylyǵy tehnıkasymen jabdyqtalǵan. Sharýashylyqta 252 tehnıka birligi bar, onyń ishinde 16 egis kesheni, 71 traktor jáne 64 astyq jınaıtyn kombaın jumys isteıdi. Bul dala jumystaryn agrotehnıkalyq talaptarǵa saı merzimde júrgizýge múmkindik beredi.
Jumys saparynyń qorytyndysy boıynsha mınıstr óńirde kóktemgi dala jumystarynyń uıymdasqan túrde júrgizilip jatqanyn jáne óńdeý men mal sharýashylyǵy salalaryndaǵy jobalardyń júıeli júzege asyrylyp otyrǵanyn atap ótti.
Jalpy, bıyl Soltústik Qazaqstan oblysynda 4,3 mln gektar jerge egin egiledi. Onyń ishinde dándi jáne dándi-burshaqty daqyldar — 2,905 mln, maıly daqyldar 908 myń, mal azyqtyq daqyldar 405 myń, kartop 8,6 myń, dándik júgeri 15 myń, kókónis daqyldary 1,4 myń gektardy quraıdy.Óńirde 10,3 myń traktor, 6,6 myń astyq jınaıtyn kombaın jáne 12,3 myń sepkish bar.
«Keń dala 2» baǵdarlamasy aıasynda 567 aýyl sharýashylyǵy taýaryn óndirýshiden 99,4 mlrd teńgege ótinim túsken. Onyń ishinde 93,1 mlrd teńge kóleminde 527 nesıe berilip, nátıjesinde 1,2 mln gektar egis alqaby jeńildetilgen qarjylandyrýmen qamtamasyz etildi.
«Jeńildikti lızıng» baǵdarlamasy boıynsha 24,1 mlrd teńgege 177 ótinim túsip, 14,7 mlrd teńgege 215 aýyl sharýashylyǵy tehnıkasyn jetkizýge 127 kelisimshart jasaldy.
E\Osyǵan deıin elde 8,9 mln gektar aýyl sharýashylyǵy daqyldary egilgeni týraly jazdyq.
