Kemsitý faktilerine jol bergen jumys berýshiler jaýapkershilikke tartylady
Zań jobasy Qazaqstan Respýblıkasynyń 2010 - 2020 jyldarǵa arnalǵan quqyqtyq saıasat tujyrymdamasyna sáıkes,áleýmettik áriptestermen jáne múddeli memlekettik organdarmen birlesip ázirlendi jáne eńbek qatynastaryn, áleýmettik áriptestikti, eńbek qaýipsizdigi men eńbekti qorǵaýdy retteýge baǵyttalǵan.
QR Eńbek jáne halyqty áleýmettik qorǵaý mınıstri Birjan Nurymbetovtiń sózine qaraǵanda, qazirgi ýaqytta teń eńbek jaǵdaılaryn qamtamasyz etpeý boıynsha kemsitý faktilerine jol bergeni úshin ákimshilik jaýapkerlik zańnamalyq túrinde joq. Osyǵan baılanysty zań jobasynda jumyskerdiń laıyqty eńbek jáne turmys jaǵdaılaryna quqyǵyn belgileý ári ákimshilik zańnamaǵa teń eńbek jaǵdaılaryn qamtamasyz etpeý boıynsha kemsitý faktilerine jol bergeni úshin jumys berýshilerdi jaýapkershilikke tartýǵa negizdeme engizý usynylady.
«Qoldanystaǵy Eńbek kodeksi boıynsha jumyskerdiń áskerge shaqyrylýy eńbek shartyn toqtatýǵa negizdeme bolyp tabylady. Osyǵan baılanysty, merzimdi áskerı boryshyn ótep júrgen azamattardyń jumys ornyn saqtaý, sondaı-aq olarǵa jalaqysy saqtalmaıtyn demalys berý boıynsha jumys berýshiniń mindetterin bekitý usynylady. Bul rette, jumyskerdiń áskerden qaıttyp kelgen kúnnen bastap bir aıdyń ishinde óz jumysyna kirisý mindeti bekitiledi», - dedi mınıstr.
Onyń aıtýynsha, búginde jalaqysy saqtalmaıtyn demalys taraptardyń kelisýi boıynsha beriledi. Alaıda, otbasynyń naýqas múshesiniń kútimi boıynsha uzaq demalys qajet bolǵan kezde jumyskerler jalaqysy saqtalmaıtyn demalys ala almaı, sonyń saldarynan jumystan shyǵýǵa májbúr bolyp jatady. Osy oraıda medıtsınalyq qorytyndyǵa sáıkes, kútimdi qajet etetin otbasy múshesine kútim jasaý úshin jumyskerlerge tolyq emes jumys ýaqyty rejımin engizý usynylady.
«Kelissózder júrgizý jáne ujymdyq sharttarǵa qol qoıý barysynda barlyq jumyskerlerdiń pikirin eskerý maqsatynda, kásipodaq músheleri bolyp sanalmaıtyn jumyskerlerdiń múddelerin bildirý boıynsha saılanbaly ókilderdiń ókilettigin bekitý josparlanýda. Budan bólek, jeke eńbek daýyn retteýdiń sotqa deıingi tártibin naqtylaý maqsatynda jumys berýshige kelisim komıssııalaryn qurýdy mindetteý usynylady», - dedi B. Nurymbetov.
Atalǵan zań jobasy aıasynda eńbek sharttaryn jasasý jáne esepke alý protsesin avtomattandyrý maqsatynda «eńbek sharttaryn esepke alýdyń biryńǵaı júıesi» degen uǵym engizilip otyr.
