Əkemnen aıyrylǵanǵa deıin koronavırýsqa sengen joqpyz: Astanalyqtar ákesiniń sanaýly kúnde qalaı kóz jumǵanyn aıtty

NUR-SULTAN. QazAqparat - Bir apta buryn Nur-Sultanda Syzdyqovtar januıasy otaǵasynan aıyryldy. Er adam tynys alý jetkiliksizdiginen, ókpe isinýimen koronavırýstan jansaqtaý bóliminde qaıtys boldy. Otbasy bul vırýsqa der kezinde nazar aýdarmaǵanyna ókinedi, dep habarlaıdy QazAqparat ákimdiktiń saıtyna silteme jasap.

«Bári kenetten boldy. Aldymen anam aýyryp qaldy, sodan keıin marqum ákem. Onyń densaýlyǵy 2 kún ishinde kúrt nasharlap ketti. Ekeýi birden KVI aýrýhanasyna jatqyzyldy», — deıdi Gúljan Syzdyqova.

Marqumnyń jaqyndarynyń aıtýynsha, onyń koronavırýstan bólek esh jeri aýyrmaǵan, ıaǵnı densaýlyǵynda kinárat bolmaǵan.

«Biz olardy qolymyzdan kelgenshe qorǵadyq. Biraq oqshaýlanýdan sharshap, qydyra bastady, dostarymen, týystarymen kóristi. Biz olarǵa qansha ret abaı bolyńdar, barlyq karantın sharalaryn saqtańdar dep eskerttik. Áli kúnge deıin ákemizdiń ómirin osy ınfektsııa jalmaǵanyna sene alar emespiz. Biz qazaqstandyqtarǵa vırýs bar ekenin jáne onyń asa qaýipti ekenin jetkizgimiz keledi. Mundaı qaıǵyny eshkimniń basyna bermesin», — deıdi marqumnyń balalary.

Koronavırýs er adamnyń ókpe organyn á degennen 36%-ǵa qabyndyrǵan. Sodan keıin tynys alý jetispeýshiligi paıda bolyp, ókpe isinýimen reanımatsııaǵa jetkizildi.

«Biz bári qalpyna kelip, jazylyp ketedi dep oıladyq. Biraq eki aptalyq kúresten keıin dárigerler bizge qaıǵyly jańalyqty jetkizdi — júregi shydamaı qaıtys boldy. Kovıdtiń kesirinen biz onymen durystap qoshtasyp, denesin úıge ákele de almadyq. Bul ınfektsııa bolǵandyqtan, ony máıithanadan birden zıratqa alyp ketti», — deıdi marqumnyń balalary.

Dárigerler tek vaktsınatsııa sizdiń jəne jaqyndaryńyzdyń densaýlyǵyn qorǵaýǵa múmkindik beretinin eske salady.

Ujymdyq ımmýnıtetti qalyptastyrý arqyly ǵana pandemııany jeńýge bolady.