Keminde 300 myń dollar ınvestıtsııa salǵan sheteldikterge Qazaqstanda 10 jyl turý múmkindigi beriledi

ASTANA. KAZINFORM — Elimizde ınvestıtsııalyq tartymdylyǵyn arttyrýǵa jáne uzaqmerzimdi iskerlik áriptestikti qoldaýǵa baǵyttalǵan ınvestorlyq vızany alý qaǵıdalary bekitildi. Tolyǵyraq Syrtqy ister mınıstriniń orynbasary Álibek Qýantyrov aıtyp berdi.

— Elimiz aımaqtaǵy eń úzdik ınvestıtsııalyq ahýaly bar memleket retinde keńinen tanylǵan. Táýelsizdik alǵan sátten bastap Qazaqstan 425 mıllıard AQSh dollarynan astam tikeleı sheteldik ınvestıtsııa tartty, bul Ortalyq Azııadaǵy barlyq tikeleı sheteldik ınvestıtsııa kóleminiń shamamen 70%-yn quraıdy, — dedi Álibek Qýantyrov «Ortalyq Azııa — Qytaı» ekinshi ındýstrııalyq-ınvestıtsııalyq yntymaqtastyq forýmynda.

Mınıstr orynbasarynyń málimdeýinshe, Qazaqstan halyqaralyq bızneske taǵy bir qadam jasady.

— Jýyrda elimizdiń ınvestıtsııalyq tartymdylyǵyn arttyrýǵa jáne uzaqmerzimdi iskerlik áriptestikti qoldaýǵa baǵyttalǵan ınvestorlyq vızany alý qaǵıdalary bekitildi. Jańa talaptarǵa sáıkes, qazaqstandyq kompanııalardyń jarǵylyq kapıtalyna nemese jergilikti baǵaly qaǵazdarǵa keminde 300 myń AQSh dollary kóleminde ınvestıtsııa salǵan shetel azamattary ınvestorlyq vıza alý úshin elektrondy ótinish bere alady. Bul «altyn vıza» keıin Qazaqstan Respýblıkasynda 10 jylǵa deıin turýǵa yqtııarhat alýǵa múmkindik beredi, — dep tolyqtyrdy spıker.

Buǵan deıin habarlaǵanymyzdaı Qazaqstan men Qytaı 25 mlrd dollarǵa 60 kelisimge qol qoıdy. 

Búginde Qazaqstan men Qytaı yntymaqtastyǵy aıasynda 2,7 mıllıard dollar bolatyn 10 joba iske asyrylý satysynda. Sonymen qatar 4,1 mıllıard dollar kólemindegi 8 joba ázirlenip jatyr. 

Aıta keteıik, búgin elordada «Ortalyq Azııa — Qytaı» ekinshi ındýstrııalyq-ınvestıtsııalyq yntymaqtastyq ІІ forýmy ótip jatyr.