Kemerovodaǵy órt: Dabyl júıesin óshirip tastaǵan kúzetshi ustaldy
ASTANA. QazAqparat - Kemerovoda órtengen «Zımnıaıa vıshnıa» saýda úıinde órt dabyly júıesin óshirip tastaǵan Jeke kúzet kásiporny (JKK) qyzmetkeri ustaldy. Bul týraly dúısenbi kúni RF Tergeý komıtetiniń resmı ókili Svetlana Petrenko málim etti, dep habarlaıdy TASS.
«Qazirgi tańda 5 kúdikti ustalyp, tergeldi. Olardyń qatarynda ǵımaratqa ıeger-kompanııanyń tehnıkalyq dırektory, aldyn ala boljam boıynsha órt bastaldy delingen alańdy jalǵa alýshy, órt dabyly júıesi qyzmetin kórsetetin uıymnyń basshysy men qyzmetkeri jáne órt dabyly oınaǵan kezde ony óshirip tastaǵan JKK qyzmetkeri bar», - dep habarlaıdy ol.
Buǵan deıin TK Kemerovodaǵy «Zımnıaıa vıshnıa» saýda úıindegi órt oqıǵasyna qatysty qozǵalǵan qylmystyq istiń 5-shi kúdiktisi bary týraly málim etken. Ol Jeke kúzet kásiporny qyzmetkeri bolyp shyqty.
Sońǵy málimet boıynsha apat saldarynan 64 adam ajal qushyp, 53-i japa shekken. 25 máıit tanyldy, onyń 13-i - balalar.
Qala aýrýhanalarynda áli 13 adam jatyr, onyń ekeýi - aýyr halde. Taǵy 49 adam úıden em alýda.
Órt sóndirýshiler jumysyn jalǵastyryp jatyr, 16 adamnyń taǵdyry belgisiz.
Eske sala keteıik, QR Prezıdenti Nursultan Nazarbaev RF Prezıdenti Vladımır Pýtınge jedelhat joldap, kóńil aıtqan bolatyn.
Al, QR Syrtqy ister mınıstrligi aldyn ala málimet boıynsha qaza tapqandar ishinde Qazaqstan azamattary joq ekendigin habarlaǵan bolatyn.
Foto: © Danıl Aıkın
