Kemerovodaǵy órt: 13 balanyń múrdesin týystary tanydy
ASTANA. QazAqparat - Búgingi kúni «Zımnıaıa vıshnıa» saýda úıindegi órtte qaza tapqan 13 balanyń denesin týystary tanydy. Bul týraly RF Densaýlyq saqtaý mınıstri Veronıka Skvortsova málim etti, dep habarlaıdy TASS.
Skvortsovanyń aıtýynsha, qazir 25 adamnyń máıiti anyqtalǵan. Marqumdardyń deneleri týystaryna seısenbi kúni tapsyrylady. Qazir sot-medıtsına sarapshylary órtten kúıgen denelerdi genetıkalyq taldaýlar arqyly anyqtaý ústinde.
«Máskeýden arnaıy kelgen mamandar máıitterdi anyqtap jatyr»,- dedi ol.
Buǵan deıin «Spetsbıýro» joralǵylyq qyzmetter mekemesiniń ókili habarlaǵandaı, marqumdardy jer qoınyna tapsyrý rásimderi 28 naýryzda bastalady. Kemerovo oblysynyń basshylyǵy jerleý rásimderi úshin qurban bolǵandardyń barlyq otbasylaryna qarjy bóletinin málimdedi.
«Zımnıaıa vıshnıa» saýda ortalyǵynda órtten qaza bolǵandardyń jalpy sany 60 adamnan asty. Aýrýhanaǵa jatqyzylǵandar sany 15-ke deıin jetti. Mınıstrdiń aıtýynsha, qazir aýrýhanada jatqandardyń arasynda 11 jastaǵy balanyń jaǵdaıy eń aýyr.
Sonymen birge týystarynan aıyrylǵan 69 adam qatty kúızeliske jáne gıpertonııaǵa shaǵymdanyp, aýrýhanaǵa túsken.
