Kemeron qorǵanysqa qosymsha 1,1 mlrd. fýnt sterlıng bóldi
ASTANA. QazAqparat - Uybrıtanııa Premer-Mınıstri Devıd Kemeron qorǵanys qajettiligi úshin qosymsha 1,1 mlrd. fýnt sterlıng bólinetindigin jarııa etti, dep habarlady sheteldik BAQ.
800 mln. fýnt sterlıng kólemindegi ınvestıtsııa barlaý, baqylaý jáne sholý maqsatyna qajetti qural-jabdyqtardy, sonymen birge áskerı barlaý úshin ushqyshsyz ushatyn apparat satyp alýǵa baǵyttalady.
«Barlaý jáne baqylaý qural-jabdyqtaryna qarjy bólý ulttyq qajettilikten týyndap otyr», - dep málim etti D.Kemeron «Farnboro-2014» avıasalonynda sóılegen sózinde.
Bólingen qarjynyń bir bóligi lańkestikpen kúres jáne kepilge alynǵandardy qutqarý salasyndaǵy Koroldik qarýly kúshterdiń áleýetin arttyrýǵa jumsalady. Taǵy 300 mln. fýnt sterlıng Typhoon ushaqtaryn radarlardyń jańa býynymen jabdyqtaýǵa jáne Protector kemesin satyp alýǵa, qoldanystaǵy áskerı baǵdarlamalardy qoldaýǵa jumsalady.
