Kemelerdegi órtti jedel sóndirý is-qımyldaryn pysyqtaý jóninde oqý-jattyǵý ótkizildi
ASTANA. Jeltoqsannyń 9-y. QazAqparat /Ernur Aqanbaı/ - Búgin Astana qalasynyń sýda qutqarý qyzmetiniń bazasy aýmaǵynda qysqy turaqqa ornalasqan kemelerde jedel órt sóndirý is-qımyldaryn pysyqtaý jóninde oqý-jattyǵý jumystary ótkizildi,
dep habarlaıdy QazAqparat.
QR Kólik jáne kommýnıkatsııa mınıstrliginiń Kóliktik baqylaý komıteti «Saryarqa» óńiraralyq kóliktik baqylaý ınspektsııasynyń fılıalymen jáne QR Tótenshe jaǵdaılar mınıstrliginiń Órtke qarsy qyzmetimen birlesip uıymdastyrǵan bıylǵy jylǵy bul oqý-jattyǵý jumystary jeltoqsannyń 9 - 14 aralyǵynda keme ıeleriniń qatysýymen ótkizilip jatyr. Oqý-jattyǵý jumystarynyń negizgi maqsaty - kemelerdiń qysqy turaqqa durys qoıylǵandyǵyn, apattyq-qutqarý jáne órtke qarsy qural-jabdyqtardyń ázirligin tekserý, qysqy turaqqa ornalasqan kemelerde órt sóndirý taktıkasyn pysyqtaý bolyp tabylady.
Kemelerdi paıdalanýdyń navıgatsııalyq kezeńi (naýryz - qarasha aralyǵynda) aıaqtalysymen sý kóligi qysqy turaqqa saqtalýǵa qoıylýy tıis. Kemelerdiń ara qashyqtyǵynyń saqtalýy, kemeler men órtke qarsy qoldanatyn qudyqtarǵa barý joldarynyń bógelmeýi - kemelerdi qysqy turaqqa qoıý kezindegi negizgi talaptardyń biri bolyp tabylady.
Oqý-jattyǵý barysynda kemelerde jalǵan órt shyǵarylyp, órtti sóndirý jáne qutqarý jumystaryn júrgizý jónindegi jedel is-qımyldar pysyqtaldy.
QR Kólik jáne kommýnıkatsııa mınıstrliginiń Kóliktik baqylaý komıteti flottaǵy apattyń aldyn alý maqsatynda sý kóligindegi qaýipsizdikti qamtamasyz etýge baǵyttalǵan osy sekildi profılaktıkalyq is-sharalardy jyl saıyn ótkizip keledi.
