Kemelbek Oıshybaev: Sottan basqa organdar jýrnalısten derekkózdi ashýdy talap ete almaýy kerek

NUR-SULTAN. QazAqparat – QR Aqparat jáne qoǵamdyq damý mınıstriniń orynbasary Kemelbek Oıshybaev elordada ótip jatqan buqaralyq medıany zańnamalyq retteý týraly konferentsııada jýrnalıstik zertteýlerdiń sapasyn arttyrý úshin qabyldanatyn zańnamalyq ózgeristerdi atady, dep habarlaıdy QazAqparat tilshisi.

«Mınıstrlik úshin basymdyqtardyń mańyzdy blogy jýrnalısterdiń quqyqtaryn qorǵaý bolyp qala beredi. Bul baǵytta da birqatar usynystar ázirlenýde. Mysaly, jýrnalıst óz qyzmetin soǵys qımyldary, qarýly qaqtyǵystar, tótenshe jaǵdaı sııaqty erekshe jaǵdaılarda júzege asyrǵan jaǵdaıda oǵan quqyqtyq kepildikterdi bekitý usynylady», - degen vıtse-mınıstri pandemııa kezeńi jýrnalısterdiń qaýipti aımaqtyń alǵy shebinde júretinin kórsetkenin eske saldy.

«Sondaı-aq, aqparattyń qupııalylyǵyn qamtamasyz etý sharalaryn zańnamalyq deńgeıde bektiýdi usynamyz. Atap aıtqanda, jýrnalıst alǵan aqparatty qupııa saqtaý shartymen jýrnalıstiń jarııalamaý quqyǵyn qarastyrý usynylady. Qupııa kóz tek sottyń talaby boıynsha ashylatynyn kózdeý qajet dep esepteımiz. Basqa jaǵdaıda eshqandaı organ derekkózdi ashýdy jýrnalısten talap ete almaýy kerek. Bul elimizde jýrnalıstik zertteýlerdiń sapasyn arttyryp, osy baǵytty damytady dep oılaımyn», -dedi mınıstrdiń orynbasary.