Kemelbek Oıshybaev: Pandemııa kezinde jalǵan aqparattyń saldary qandaı bolatynyn kórdik
Astana Media Week 2020 sharasynyń «Pandemııa jáne BAQ-qa senim daǵdarysy» plenarlyq sessııasynda Aqparat jáne qoǵamdyq damý vıtse-mınıstri Kemelbek Oıshybaev osylaı dedi, dep habarlaıdy QazAqparat tilshisi.
«Jańa basymdyqtar men syn-tegeýrinder aıqyndaldy. Pandemııa kezeńinde resmı BAQ – aqparat alýdyń negizgi kózine aınaldy, sebebi bul rette ótip jatqan jaǵdaıdyń shynaıylyǵy birinshi orynǵa shyqqan bolatyn. Aldymyzǵa qoǵamdaǵy jalǵan aqparattarǵa jol bermeý mindetin qoıdyq. Osy rette Ortalyq Azııanyń qaýipsizdik jáne seriktestik máseleleri jónindegi ınstıtýtynyń málimetine sáıkes, 2020 jyldyń sáýir aıynda Qazaqstanda aqparattyq materıaldarǵa ený kórsetkishi 72,5 mıllıonǵa deıin artqan. ıAǵnı jýrnalıster daıarlap, taratatyn aqparatqa degen qajettilik artyp barady. Jalpy pandemııa ýaqytynda jalǵan aqparat pen arandatýdyń saldary kútpegen jaǵymsyz jaǵdaılarǵa aparyp soǵatynyna kóz jetkizdik», - dedi Kemelbek Oıshybaev.
Vıtse-mınıstrdiń aıtýynsha, áleýmettik jelide ártúrli aqparat tarap ketkendikten halyq onyń qaısysyna senip, qaısysyna senbeý kerektigin bilmeı qalǵan. Kemelbek Oıshybaev bul rette «Qazaqstanda aýaǵa vırýs taratatyn ushaq bar eken» degen jalǵan aqparattyń ózi birshama dúrbeleń týdyrǵanyn eske saldy.
Onyń sózinshe, mundaı aqparattardyń mán-jaıyn ýaqtyly túsindirip otyrmasa, qoǵamda dúrbeleń týyp ketýi múmkin.
Aıta ketsek eloradada Astana Media Week 2020 sharasy ótip jatyr. Іs-sharanyń negizgi maqsaty – otandyq medıasalany damytý men ındýstrııadaǵy iskerlik qarym-qatynasty aımaqtyq jáne halyqaralyq deńgeıde ilgeriletý. Medıaaptalyq tórtinshi jyl qatarynan álemniń túpkir-túpkirinen jetekshi sarapshylardy dástúrli túrde jınap, ózekti taqyryptar talqylanady.
