Kemel Toqaev — detektıv janrynyń atasy ǵana emes, qazaqtan shyqqan tuńǵysh kınosynshy
Kemel Toqaev qazaq ádebıetindegi detektıv janrynyń ǵana jampozy emes, qazaq kınoretsenzııasynyń da alǵashqy qarlyǵashy. Bul týraly «QazAqparat» tilshisine jazýshy, jýrnalıst, Qazaqstannyń eńbek sińirgen qaıratkeri Kósemáli Sáttibaıuly aıtty.
Kemel Toqaevtyń shyǵarmashylyǵy men ómirbaıanyn zertep júrgen jazýshy, jýrnalıst Kósemáli Sáttibaıulynyń aıtýynsha, qazaq detektıv janrynyń darabozy eńbek jolyn Jambyl oblystyq «Stalındik jol» gazetinde bastaǵan eken.
«Jazýǵa kirispes buryn Kemel aǵanyń ómirbaıanyna úńildim. Arhıvterden izdedim. Biz tanysqan ómirbaıanda ol kisi eńbek jolyn «Lenınshil jas» gazetinen bastaǵan dep jazylǵan. Biraq qalamgerdiń 1948 jyly Jambyl oblystyq «Stalındik jol» gazetinde de tilshi bop eńbek etkeni týraly derekti taptym. Іzdegenim de osy bolatyn», - deıdi Kósemáli Sáttibaıuly
Sonymen qatar, jýrnalıst Kemel Toqaevtyń qazaq ádebıetindegi detektıv janrynyń ǵana jampozy emes, qazaq kınoretsenzııasynyń da alǵashqy qarlyǵashy ekenin jetkizdi.
«Kemel Toqaevtyń «Jas gvardııa» dep atalatyn kınoretsenzııasy biz aıtyp otyrǵan gazettiń 1948 jylǵy 24 qazandaǵy nómirine (№213 (2524) jarııalanypty. Jas jýrnalıster birden kınoretsenzııaǵa barmaıdy. Al, Kemel Toqaev bir jyldyń ishinde aýqymdy úsh kınoretsenzııa jazǵan. Atap aıtar bolsam, Aleksandr Fadeevtiń romany boıynsha túsirilgen «Jas gvardııa», «Alystaǵy qalyńdyq» jáne «Sibir jeri týraly ańyz» kınosy. Bolashaq jazýshy ózin kórkem týyndyǵa jeteleıtin joldy sol kezde-aq tapqan sııaqty. Sonymen birge, biz ony qazaq ádebıetindegi detektıv janrynyń ǵana jampozy emes, qazaq kınoretsenzııasynyń da alǵashqy qarlyǵashy dep aıta alamyz. Ol jyldary qazaq kıno óneri áli damymaǵan bolatyn. Sondyqtan, bul kisi detektıv janrynyń atasy ǵana emes, qazaq kıno ónerindegi tuńǵysh kınosynshy. Derek pen dáıek osynyń dáleli»,- dedi Kósemáli Sáttibaıuly.
