Kemel Toqaev atyndaǵy detektıv shyǵarmalar baıqaýynyń jeńimpazdary anyqtaldy
SEMEI. KAZINFORM – Semeı qalasynda Kemel Toqaev atyndaǵy IX respýblıkalyq detektıv shyǵarmalar baıqaýy qorytyndylanyp, úzdik avtorlar marapattaldy.
Ádebı dodanyń qorytyndy sharasyna Abaı oblysynyń ákimi Berik Ýálı, «Zań» Medıa-korporatsııasynyń dırektory Dosymbek Óteǵalıev, jýrnalıst Dáýlethan Jıenqul, Qyzylorda oblysy máslıhatynyń depýtaty Ámirbek Shaımaǵambetov, Abaı oblystyq sotynyń tóraǵasy Qaırat Shaqpantaev jáne zııaly qaýym ókilderi qatysty.
«Zań» Medıa-korporatsııasynyń bastamasymen qolǵa alynǵan baıqaý elimizdiń birqatar óńirinde uıymdastyrylyp, detektıv janrynda qalam terbeıtin avtorlardy qoldaýǵa baǵyttalǵan. Bıyl ádebı doda alǵash ret Abaı oblysynda ótti.
Aımaq basshysy qazaq ádebıetinde kenjelep qalǵan detektıv janryn damytýda baıqaýdyń ózindik orny qalyptasqanyn atap ótti.
– «Qazaq detektıviniń atasy» atanǵan Kemel Toqaevtaı jazýshynyń murasyn jańǵyrtyp, kenjelep qalǵan janrdyń damýyna qozǵaý salǵan bul baıqaýdyń ómirsheń, el ıgiligine qyzmet etetini alǵashqy qadamynan-aq baıqalǵan bolatyn. Ony shytyrman shyǵarma jazýǵa degen qyzyǵýshylar sanynyń jyl ótken saıyn artyp kele jatqanyna qarap baǵamdaý qıyn emes. Sonyń arqasynda qazaq detektıviniń qory da kórkem, syndarly, sony shyǵarmalarmen tolyǵa tústi. Buǵan deıin elimizdiń ár túkpirinde jelkenin jaıyp, detektıv jazýǵa qabileti bar jandardy yntalandyryp kelgen baıqaýdyń jalaýy bıyl kıeli Abaı elinde jelbirep otyr, – dedi Berik Ýálı.
Bıyl baıqaýda júldege ilikken 15 úzdik shyǵarma alǵash ret qorytyndy sharaǵa deıin «Sony soqpaq» degen atpen jeke jınaq bolyp jaryq kórdi. Kitaptyń tusaýkeseri Semeıdegi qorytyndy sharada ótti. Jınaqqa Halyq qaharmany, jazýshy Qasym Qaısenovtiń Kemel Toqaev týraly esteligi de engizilgen.
Baıqaýǵa usynylǵan shyǵarmalardy jýrnalıst, Quryltaı depýtaty Janarbek Áshimjan bastaǵan qazylar alqasy saralady. Qazylar quramynda jazýshy, jýrnalıst Serik Ábikenuly, Qazaqstan Jazýshylar odaǵy Abaı oblystyq fılıalynyń tóraǵasy Mereı Qart jáne quqyq salasynyń ardageri, advokat Baýyrjan Ahmetov boldy.
Baıqaýdyń bas júldesin «Aq kóılek» shyǵarmasymen aqyn, jazýshy Ádilbek Ybraıymuly jeńip aldy.
Birinshi oryn «Medbıkeniń minájaty» shyǵarmasynyń avtory Aldajar Ábilovke berildi. Ekinshi oryndy «Qońyr qaıysqa túsken tańba» shyǵarmasymen Zakıra Nurlanqyzy jáne «Ala jip» shyǵarmasymen Bolaı Berdıeva ıelendi.
Úshinshi oryn «Batpyraýyq» shyǵarmasynyń avtory Sabyrbek Oljabaıǵa, «Qarmaq» shyǵarmasynyń avtory Mıras Muqashqa jáne «Oıanbaǵan áke» shyǵarmasynyń avtory Ashat Ómirbaevqa buıyrdy.
Abaı oblysynyń týmalary Arýjan Musataeva «Aldanǵan arman» shyǵarmasy úshin, Saıa Isa «Pıanıstiń ajaly» shyǵarmasy úshin yntalandyrý jáne arnaıy júldelermen marapattaldy.
Kemel Toqaev atyndaǵy respýblıkalyq detektıv shyǵarmalar baıqaýy kelesi jyly on jyldyǵyn atap ótedi. Uıymdastyrýshylar mereıtoılyq dodany jańa formatta ótkizip, buǵan deıin bas júlde men birinshi oryn ıelengen avtorlar arasynda detektıv povest janry boıynsha shyǵarmashylyq saıys ótkizýdi josparlap otyr.
Aıta keteıik, Kemel Toqaev qazaq ádebıetindegi detektıv janrynyń negizin qalaýshylardyń biri sanalady. Buǵan deıin qalamgerdiń shyǵarmashylyǵy, onyń qazaq detektıvimen qatar otandyq kıno synynyń qalyptasýyna qosqan úlesi týraly jazǵan edik.
