Kemel Aqyshev «Altyn adamdy» taýyp, ony táýelsiz Qazaqstannyń brendine aınaldyrdy - Darhan Myńbaı (FOTO)
ASTANA. QazAqparat - Búgin QR Ulttyq mýzeıinde kórnekti ǵalym, Qazaqstan arheologııa mektebiniń negizin salýshylardyń biri, tarıh ǵylymdarynyń doktory Kemel Aqyshevtyń 90 jyldyq mereıtoıyna arnalǵan «Uly dalanyń kemeńger ǵalymy» atty kórmeniń tusaýy kesildi, dep habarlady Ulttyq mýzeıdiń baspasóz qyzmetinen.
Kórme Kemel Aqyshulynyń Qazaqstannyń ejelgi tarıhy men arheologııasyna qatysty baı murasyn nasıhattaýdy maqsat tutqan. Kórmege K. Aqyshev atyndaǵy ǵylymı-zertteý ortalyǵynyń qatysýymen ázirlengen arheologııalyq artefaktiler men fotoqujattar jáne ǵalymnyń jeke zattary qoıylady. Kórmeniń ashylý saltanatynda Ulttyq mýzeıdiń dırektory Darhan Myńbaı sóz sóıledi. - Kemel Aqyshev Qazaqstan arheologııasynyń negizin qalap qana qoıǵan joq, úlken mektep qalyptastyrdy. Bul mekteptiń mańyzy jyldan jylǵa arta beredi. Biz áli ol kisiniń murasyn tolyq zerttep bolǵan joqpyz. Kemel Aqyshev Qazaqstannyń ǵylymyna ǵana emes, adamzat ǵylymyna qomaqty úles qosty. Altyn adamdy taýyp, ony táýelsiz Qazaqstannyń brendine aınaldyrdy. Kemel Aqyshevtyń 90 jyldyq mereıtoıyna arnalǵan kórmeni búkil ǵalymdarǵa jáne ǵylymı jumystarǵa degen qurmet dep qabyldaý kerek. Óıtkeni, naǵyz ǵylymı jumys eshqashan qunyn joǵaltpaıdy, - dedi Darhan Myńbaı. Kórmege K.Aqyshevtyń áriptesteri men dostary jáne týǵan-týystary qatysty. Olardyń arasynda QR UǴA akademıgi, tarıh ǵylymdarynyń doktory, antropolog Orazaq Ysmaǵulov boldy. «Búgin atqarylyp jatqan is syrttan qaraǵanda qarapaıym bolyp kórinýi múmkin. Alaıda onyń máni men mańyzy, kóterer júgi erekshe. Sebebi, Kemel Aqyshev bar ǵumyryn arheologııa salasyna sarp etti. Onyń osy salada ulyqtalýy, qurmet kórýi zańdylyq. Arheologııa - kez kelgen eldiń tarıhynyń qaqpasy sanalady. Bizge sol qaqpany arheolog Kemel Aqyshev ashyp berdi, - dedi ol. Sonymen qatar, búgin «Táýelsiz Qazaqstan arheologııasynyń damý úrdisteri men keleshegi» degen taqyrypta dóńgelek ústel ótti. Dóńgelek ústelde E.Bóketov atyndaǵy QARMÝ professory Saǵyndyq Jaýymbaev, «Kókshe» Akademııasynyń professory Vıktor Zaıbert, E. Bóketov atyndaǵy QARMÝ dotsenti Vıktor Varfolomeev jáne K. Aqyshev atyndaǵy Ǵylymı-zertteý ortalyǵynyń dırektory, ǵalymnyń jary Maral Habdýlına baıandama jasady. Esterińizge sala keteıik, Kemel Aqyshev tutas Eýrazııa keńistigine álemge máshhúr bolyp otyrǵan «Altyn adamdy» tapqan arheolog retinde tanymal. Ol ár jyldary Besshatyr, Otyrar qorymdary men ejelgi jáne ortaǵasyr mádenıetine qatysty eskertkishterdiń qazba jumystaryna jetekshilik etken. Onyń jetekshiligimen Astanadan 5 shaqyrym jerde, Buzyqty ózeniniń Shyǵys jaǵalaýynda ornalasqan Bozoq qalashyǵy tabyldy. K.Aqyshev 200 ǵylymı eńbek pen 15 kitaptyń avtory. «Qurmet», «Jeńis», «Parasat» ordenderiniń ıegeri. K.Aqyshevtyń esimi Qazaqstannyń Altyn qurmet kitabyna engizilgen.
