Kembrıdjde eko-meshit boı kóteredi
ASTANA. 28 qyrkúıek. QazAqparat - Ulybrıtanııanyń Kembrıdj qalasynda qanshama ýaqyttan beri salynady dep josparlanyp júrgen birinshi ekologııalyq taza meshit qoldaý taýyp, jobasy pysyqtaldy. Bul týraly muslim.kz saıty jazady.
«Bul Kembrıdj úshin eleýli jańalyq bolyp otyr», - dedi osynaý meshittiń bastamashysy, Musylman akademııalyq qorynyń tóraǵasy Tım Vınter. Atalǵan bastamany musylmandar 2008 jyly kótergen bolatyn. Qorshaǵan ortaǵa zalal tıgizbeıtin, kómirtegin meılinshe az bóletin ári dinmen baılanysty ásire belsendilikke «jol bermeıtin» mundaı joba Eýropa jurtshylyǵy úshin múldem tańsyq.
«Kembrıdj - álemniń túkpir-túkpirinen stýdentter men oqytýshylar aǵylyp keletin brıtan qalalarynyń biri. Kelýshilerdiń kóbisi - musylmandar», - dedi Vınter.
Kembrıdjde turǵyzylatyn meshittiń birqatar ereksheligi bar: áıgili landshaft dızaıneri Emma Klarktyń bas-kóz bolýymen úlken baý-baqshanyń jobasy qolǵa alynbaq, sondaı-aq, sýdy óńdeıtin qurylǵy ornatylyp, tabıǵı jeldetkish pen jaryq, jasyl jelek (shatyr) jaǵy qarastyrylady. «Qustar uıa salýy úshin arnaıy oryn bólinedi. Serýendeýshilerge de jaǵdaı jasalady», - dep habarlaıdy OnIslam.net.
