Kembrıdj ýnıversıtetinde Shákárimniń shyǵarmashylyǵy týraly kitaptyń tusaýkeseri ótti
Tusaýkeser barysynda álemge áıgili joǵarǵy oqý orynynyń vıtse-prezıdenti Pıter Nolan jáne Kembrıdj professorlarymen kezdesý uıymdastyrylyp, L.N.Gýmılev atyndaǵy Eýrazııa ulttyq ýnıversıteti jáne Kembrıdj ýnıversıteti arasynda ǵylymı jumystar jasaý men ózara yntymaqtastyq jónindegi memorandýmǵa qol qoıyldy.
Brıtandyq akademııalyq jurtshylyqqa qazaq halqynyń uly fılosofy, aqyny Shákárim Qudaıberdiulynyń ómirbaıany tanystyryldy.
Tusaýkeserdiń ekinshi bóligi dısskýssııa túrinde ótti - qatysshýlar avtorǵa óz suraqtaryn qoıdy. Sóıtip, "Shakarim. The life of a kazakh poet" aǵylshyn tilindegi nusqasy óte joǵary deńgeıde ótti.
Kembrıdj ýnıversıtetiniń professory Sıdhart Saksen: «Shákárimniń shyǵarmashylyǵymen tanysý men úshin Qazaqstandy jańa qyrynan taný boldy jáne aqynnyń fılosofııalyq oılary meni erekshe tebirentti», - dese, mádenıettaný doktory A.Taızenhaýzen: «Bul kitapta qazaq aqyny, fılosof ári pedagog Shákárimniń búkil ómiri baıandalǵan. Bul jerde bir aqynnyń ómirbaıany ǵana emes, sonymen qatar búkil ulttyń tarıhy jatyr», - dep baǵa berdi.
Esterińizge sala keteıik, qazaqtyń uly aqyny týraly kitap qazirgi tańda 4 tilde - qazaq, orys, aǵylshyn, túrik tilderinde jaryq kórdi, aldaǵy ýaqytta qytaılyq oqyrmandardyń suranysy boıynsha kúnshyǵys eliniń tilinde jaryq kórmek.
Sonymen qatar ýnıversıtet rektory osy sapar barysynda "Bolashaq" baǵdarlamasy boıynsha bilim alyp jatqan qazaqstandyq stýdenttermen de júzdesti.
Taǵy da atap ótetin bir jaıt - Qazaqstan rektorlar Keńesi tóraǵasy Erlan Sydyqov QS Halyqaralyq reıtıng agenttiginiń negizin qalaýshysy ári qazirgi tańdaǵy tóraǵasy Nýntsııa Kýakýarellımen kezdesti. Kezdesý barysynda qazaqstandyq joǵary oqý oryndarynyń álemniń aldyńǵy qatarly bilim ordalaryna kirý jaıy keńinen áńgime boldy, dep habarlaıdy EUÝ baspasóz qyzmetinen.
