Kelisimge keldi: Almatyda 10 tamyzda «Qaırat» – «Jeńis» oıyny emes, Djeı Lonyń kontserti ótedi

ALMATY. KAZINFORM – Bul týraly «Qaırat» fýtbol klýby men kontsert uıymdastyrýshylary habarlady.

Djennıfer Lopestiń kontsert aldyn ala habarlanǵandaı 10 tamyz kúni Almatynyń bas sporttyq alańynda ótedi.

- Djennıfer Lopestiń Almaty qalasynda ótetin kontsertin uıymdastyrýshylar – First Media Group jáne CA Entertainment kompanııalary, sondaı-aq «Qaırat» fýtbol klýbynyń basshylyǵy men Almaty qalasynyń sporttyq nysandar dırektsııasy birlesip, 2025 jylǵy 10 tamyzǵa josparlanǵan kontsertti ótkizý máselesi boıynsha kelisimge keldi, - dep habarlady kontsert uıymdastyrýshylary.

Resmı málimdemege sáıkes, Almatyda 9 ne 10 tamyz kúni ótýi kerek bolǵan Qazaqstan Premer-lıgasynyń «Qaırat» – «Jeńis» oıyny 21 qyrkúıekke aýystyrylǵan. Al «Qaırat» fýtbol klýbynyń 7 jáne 12 tamyzǵa josparlanǵan eýrokýboktyq jarystaǵy matchtary ózgerissiz qalyp, buryn jarııalanǵan keste boıynsha ótkiziledi.

- «Qaırat» fýtbol klýbynyń basshylyǵyna, Qazaqstan fýtbol federatsııasyna, «Jeńis» fýtbol klýbynyń basshylyǵyna, Almaty qalasynyń Sporttyq nysandar dırektsııasyna jáne joba qoldaǵan barlyq tıisti qyzmetterge alǵysymyzdy bildiremiz. Osyndaı birlesken sheshimder Almatyny týrıstik ortalyq retinde damytýǵa óz úlesin qosatynyna senimdimiz, - delingen uıymdastyrýshylar málimdemesinde.

Djennıfer Lopestiń Almatydaǵy kontsertine bıletter 28 mamyr kúni saǵat 10:00-de ticketon.kz saıtynda satylymǵa shyǵady.

Eske salaıyq, prodıýser Málik Hasenov Djennıfer Lopes 10 tamyz kúni Almatynyń Ortalyq stadıonynda jeke kontsertin ótkizetinin aıtqan edi.

Keıin «Qaırat» fýtbol klýby bul is-sharaǵa kelisim bermegenin habarlady.