Kelisi 1600 teńge: mınıstrlik kıik etiniń baǵasyn usyndy

ASTANA. KAZINFORM — Aýyl sharýashylyǵy mınıstrligi kıik etiniń baǵasyn jarııalady.

Vedomstvonyń baspasóz qyzmetiniń málimetinshe, kıik etiniń usynylatyn quny — bir kılogramyna 1600 teńge.

Buǵan deıin Aýyl sharýashylyǵy mınıstri Aıdarbek Saparov kıik etiniń naqty baǵasy 10 kún ishinde anyqtalatynyn habarlaǵan edi.

— Jumys endi ǵana bastaldy, bul ispen Ekologııa jáne tabıǵı resýrstar mınıstrligi aınalysyp jatyr. Bizdiń mindet — et kombınattaryn qamtamasyz etý. Qazir 18 kásiporyn tirkelgen, olarda veterınarlyq mamandar da jumys isteıdi. Baǵa, logıstıka jáne satý formatyna baılanysty odan arǵy protsess anyqtalady. Bir apta ishinde, ári ketse 10 kúnde naqty málimet beremiz, — dedi ol Úkimet otyrysynan keıin ótken baspasóz máslıhatynda.

Sondaı-aq elimizde kıikterdiń sanyn retteý týraly sheshim qabyldanǵany belgili. 2025 jylǵy esepke sáıkes, atalǵan janýarlardyń popýlıatsııasy 3,9 mıllıon basqa jetip, 1974 jylǵy tarıhı maksımýmnan (1,2 mln) úsh ese artqan. Tek Batys Qazaqstan oblysynyń ózinde 2,3 mıllıonnan astam kıik bar. 

Ekologııa jáne tabıǵı resýrstar mınıstri Erlan Nysanbaevtyń aıtýynsha, kıikterdiń sanyn retteý týraly sheshim Ǵylym jáne joǵary bilim mınıstrligine qarasty Zoologııa ınstıtýtynyń ǵalymdary daıyndaǵan bıologııalyq negizdeme men Aýstralııa, Fınlıandııa, Kanada, AQSh jáne OAR-dyń jabaıy janýarlar popýlıatsııasyn turaqty basqarý salasyndaǵy halyqaralyq tájirıbesine súıene otyryp qabyldandy. 

Aıta keteıik, Aýyl sharýashylyǵy mınıstri Aıdarbek Saparov kıik etiniń baǵasyna qatysty buǵan deıin de túsinik bergen edi. 

Buǵan deıin habarlaǵanymyzdaı, batysqazaqstandyq ǵalymdar kıik etinen shujyq jasap shyǵardy.

Sondaı-aq el aýmaǵynda kimderge kıik aýlaý ruqsat beriletini týraly jazǵan edik.