Kelnde 100 kúndik oqshaýlaý men 60 kúndik tósek rejımi boıynsha erekshe tájirıbe bastaldy
ASTANA. KAZINFORM – Germanııanyń Keln qalasynda adam aǵzasynyń shekti múmkindikterin anyqtaýǵa baǵyttalǵan erekshe ǵylymı tájirıbe bastaldy. Onda qatysýshylar 100 kún boıy oqshaýlanǵan jaǵdaıda ómir súrip jatyr, dep habarlaıdy Deutsche Welle.
Zertteýdi Germanııanyń aeroǵarysh ortalyǵy (DLR) ǵalymdary júrgizip otyr. Eksperımentke qatysýshylar shaǵyn top quramynda syrtqy álemmen baılanyssyz, qatań erejelerge baǵyna otyryp ómir súredi. Ǵalymdar mundaı jaǵdaılardyń adamnyń densaýlyǵyna, jumys qabiletine jáne psıhologııalyq kúıine qalaı áser etetinin zertteýde.
Sonymen qatar parallel túrde tósek rejımine qatysty zertteý júrgizilýde. Oǵan qatysqan 12 adam 60 kún boıy tósekten turmaıdy. Ǵylymı tájirıbede salmaqsyzdyq jaǵdaıy modeldengen: qatysýshylardyń tósegi bas jaǵyna qaraı 6 gradýs eńkeıtilgen.
Mamandardyń aıtýynsha, bul ádis aǵzadaǵy suıyqtyqtyń qaıta bólinýine ákeledi. Nátıjesinde bulshyqet massasy azaıyp, tepe-teńdik sezimi nasharlaıdy, bul ǵaryshtaǵy jaǵdaıǵa uqsas.
Zertteý Aı men Marsqa ushýǵa daıyndyq aıasynda júrgizilýde. Ǵalymdardyń málimetinshe, Aıǵa ushý shamamen úsh kúnge sozylady, al Marsqa sapar qolaıly jaǵdaılarda alty aıǵa deıin jalǵasýy múmkin.
Eksperımentke qatysýshylar «jerdegi astronavtar» dep atalady. Olardyń derekteri bolashaqta ǵaryshkerlerdi uzaq merzimdi ushýlarǵa tıimdi daıyndaýǵa múmkindik beredi.
Aıta keteıik, buǵan deıin Frantsııa ǵaryshty áskerı baǵyttardyń biri retinde belgilegeni, al Qytaı kommertsııalyq ǵarysh salasyna biryńǵaı standart engizip jatqany habarlanǵan bolatyn.
