Kelisimshart mindetin oryndamaǵan kásipkerler qandaı jaǵdaıda aıyppul tólemeıdi
NUR-SULTAN. QazAqparat – QR Premer-Mınıstriniń birinshi orynbasary Álıhan Smaıylov shekaradaǵy kedergi kesirinen mindettemelerin oryndaı almaı jatqan kásipkerlerdiń máselesi týray túsinikteme berdi, dep habarlaıdy QazAqparat tilshisi.
Májilis depýtattary Qytaı shekarasyndaǵy fors-majorǵa baılanysty mindettemelerin oryndaı almaı otyrǵan kásipkerlerdiń máselesin aıtyp, Úkimet basshynyń birinshi orynbasary Álıhan Smaıylovqa saýal joldaǵan bolatyn.
«QR Azamattyq kodeksiniń 359-baby boıynsha, kásipkerlik qyzmetti júzege asyrý kezinde mindettemeni oryndamaǵan nemese tıisinshe oryndamaǵan adam, eger tıisinshe oryndaý eńserilmeıtin kúshtiń, ıaǵnı tótenshe jáne osy jaǵdaılarda bolmaı qoımaıtyn mán-jaılardyń (dúleı qubylystar, áskerı is-qımyldar, tótenshe jaǵdaı jáne t.b.) saldarynan múmkin bolmaǵanyn dáleldeı almasa, múliktik jaýapkershilik arqalaıdy. Naryqta mindettemede kórsetilgen qajetti taýardyń, jumystardyń nemese qyzmetterdiń bolmaýy bul jaǵdaıǵa jatpaıdy», - dep jazdy Álıhan Smaıylov depýtattyq saýalǵa bergen jaýabynda.
Onyń aıtýynsha, fors-major jaǵdaılarynyń týyndaýyn kýálandyrý nemese ony berýden bas tartý týraly sheshim ótinish berýshi usynǵan aqparat pen qujattardy zerdeleý jáne taldaý negizinde beriledi. Sondyqtan naqty quqyqtyq qatynastar sheńberinde mindettemelerdi oryndaý múmkindigine qandaı da bir mán-jaılar men olardyń saldarynyń áserin dáleldeý (qujattamalyq rastaý) aýyrtpalyǵy ótinish berýshige júkteledi.
«Sonymen qatar, «QR Ulttyq Kásipkerler palatasy týraly» Zańy boıynsha QR Syrtqy saýda mámileleri men halyqaralyq sharttarynyń talaptary fors-major jaǵdaılaryn kýálandyrý jónindegi fýnktsııalar, respýlıka aýmaǵyndaǵy saýda jáne port rásimderi «Atameken» Ulttyq kásipkerler palatasynyń quzyretine jatady», - delingen jaýapta.
UKP aqparaty boıynsha qyzmetter quny mynadaı:
- fors-major jaıdaılarynyń bolýy/ bolmaýy mánine qujattardy taldaý quny qosymsha qun salyǵyn eseptemegende – 15 AEK;
- shart boıynsha oryndalmaǵan mindetteme somasynyń 1%-y, biraq fors-major mán-jaılaryn jáne Hardship mán-jaılaryn kýálandyrý quny qosymsha qun salyǵyn eseptemegende – 850 AEK-ten artyq emes.
«Tólemniń ekinshi bóligi kýálik berilgen jaǵdaıda alynady. Basqa jaǵdaıda qaıtarylmaıtyn soma bolyp tabylatyn tólemniń birinshi bóligi ǵana tólenedi. «2020 jylǵy 27 naýryz ben 31 qazan aralyǵynda «Atmaeken» UKP bıznesti qoldaý úshin buryn-sońdy bolmaǵan sharalardy qoldana otyryp, qyzmettiń bul túrin aqysyz negizde kórsetkenin atap ótý qajet. Fors-majordy kýálandyrý úshin aqy alý praktıkasy halyqaralyq praktıkada bar. Kýáliktiń quny aıyppuldar, ósimpuldar nemese oryndalmaǵan mindettemeler somasynyń 1%-yn quraıtynyn atap ótken jón. Sonymen qatar, bıznes sýbektileri daýly jaǵdaılardy shart talaptary aıasynda sotqa deıingi rásimder arqyly retteýge quqyly», - dep túsindirdi ol.
Sonymen qatar, Premer-Mınıstrdiń orynbasary fors-major týraly anyqtamanyń bolýy mindetti emes ekenin, al kýáliktiń ózi mindettemelerdi oryndaýdan sózsiz bosatatyn qujat bolyp tabylmaıtynyn, al sot bul anyqtamany daýdaǵy dáleldemelerdiń biri retinde ǵana qaraıtynyn atap ótti.
«Mundaı jaǵdaıda yqtımal daýlar boıynsha túpkilikti sheshimdi sot shyǵarady. Kórsetiletin qyzmetterdiń ózindik qunyn jáne rentabeldilik paıyzyn eskere otyryp, bul shara shaǵyn jáne orta kásipkerlik sýbektilerine júktemeni arttyrady. Al iri bıznes sýbektileri eleýli jeńildikterge ıe bolady. Osyǵan baılanysty UKP qoldanystaǵy tarıfterge ózgerister engizýdi orynsyz dep sanaıdy», - dep túıindedi Álıhan Smaıylov.
