Kelisimge qosylý Qazaqstandaǵy jol qozǵalysy qaýipsizdiginiń deńgeıin halyqaralyq talaptarǵa deıin jetkizýge yqpal etetin bolady
ASTANA. Qazannyń 13-i. QazAqparat - Qazaqstan kólik quraldary ǵalamdyq tehnıkalyq erejelerge qosylýdy kózdep otyr. Osy oraıda Úkimet «Dońǵalaqty kólik quraldaryna, dońǵalaqty kólik quraldarynda ornatylýy nemese paıdalanylýy múmkin jabdyqtaý zattary men bólshekterge arnalǵan jahandyq tehnıkalyq erejelerdi engizý týraly kelisimdi ratıfıkatsııalaý týraly» zań jobasyn Májilistiń qaraýyna berdi.
Kelisimdi ratıfıkatsııalaý Qazaqstan Respýblıkasynyń qaýipsizdik, qorshaǵan ortany qorǵaý, energııany tıimdi paıdalaný jáne aıdap áketýden qorǵaý salasynda dońǵalaqty kólik quraldarynyń, jabdyqtaý zattary men bólshekteriniń jumys sıpattamalaryna qatysty ǵalamdyq tehnıkalyq erejelerge qosylýyna múmkindik beredi.
Jol qozǵalysy qaýipsizdigin qamtamasyz etý salasyndaǵy ulttyq zańnamaǵa osy Kelisimde kózdelgen Atqarý komıtetiniń maqsattaryn, rásimderiniń qaǵıdasyn, tehnıkalyq erejelerge arnalǵan krıterıılerdi, jahandyq tehnıkalyq erejelerdiń kompendıýmy men tizilimin, engizilgen jahandyq tehnıkalyq erejelerdi qabyldaý jáne olardyń qoldanylýy týraly habarlamalardy, daýlardy sheshilýin kórsetetin túzetýler engizý qajet.
Kelisim osyndaı zattarmen jáne bólshektermen kólik quraldarynyń konstrýktsııasyn, qaldyq gazdardy shyǵarý júıesin, shınalardy, qozǵaltqyshtardy, shýǵa qarsy ekrandardy, aıdap áketýge qarsy dabyl júıelerin, eskertý qurylǵylaryn jáne balany ustaıtyn júıelerdi belgileıdi.
Kelisimge qosylý Qazaqstan Respýblıkasyndaǵy jol qozǵalysy qaýipsizdiginiń deńgeıin halyqaralyq talaptarǵa deıin jetkizýge jáne elimizde kólik quraldaryna ekologııalyq talaptardy engizýge yqpal etetin bolady.
19 memleket osy Kelisimge qatysýshy bolyp tabylady.
