"Kelisim kemeldenip keledi" - respýblıkalyq basylymdarǵa sholý
«Egemen Qazaqstan» gazetiniń búgingi sanynda Kedendik odaq máseleleri kóterilgen «Kelisim kemeldenip keledi» atty maqala jaryq kórdi. «Keshe elordadaǵy "Rıksos" qonaqúıinde Úkimet basshysy Kárim Másimovtiń qatysýymen "Birtutas ekonomıkalyq keńistik - Qazaqstannyń jańa múmkindikteri" atty dóńgelek ústel bolyp ótti. Onda BEK tóńiregindegi saýaldar men kelisimder sóz bolyp, Keden odaǵy boıynsha sońǵy aqparattar jarııalandy», dep jazady gazet.
Keden odaǵy aıasynda júrgizilgen saýda-sattyqtyń 9 aıdaǵy qorytyndysy boıynsha qazaqstandyq ónim eksporty Reseıge 48 paıyzǵa artqan. Bul kórsetkishke shıkizat, óńdeý taýarlary esebinen qol jetkizilgen. Al Belarýs eline shyǵarylǵan munaı ónimderi, allıýmınıı esebinen eksport eki esege ósken kórinedi. Qazaqstan, Belarýs, Reseı elderin biriktiretin birtutas ekonomıkalyq keńistiktiń quqyqtyq bazasy 17 negiz qalaýshy kelisimnen turady. Olar taýarlar qozǵalysyn, qyzmet kórsetý men kapıtaldy rettep otyrady.
«Alash aınasy» basylymy «Basshyny jazalaý basqaǵa oı sala ma?» degen maqalasynda elimizde joǵary zvenodaǵy menedjerlerdi fıdýtsıaldy zań qabyldaý arqyly dırektorlar keńesiniń múshelerin jaýapkershilikke tartý týraly bastamany Qarjylyq baqylaý agenttigi kótergendigi jóninde habarlaıdy. Gazettiń jazýynsha, eger kompanııa defoltqa ushyraǵan bolsa, onyń shyǵynyn dırektorlar keńesi tolyǵymen óteıtin bolady. «Degenmen, sarapshylardyń pikirinshe, bulaısha zańdy qataıtamyz dep, elimizdegi reıderlik áreketti kúsheıtip jiberýimiz yqtımal», deıdi «Alash aınasy».
Sonymen qatar gazettiń osy sanynda «Aýtızmge shaldyqqan balalardyń jaıyn kim oılaıdy?» atty maqala shyqty. Onda aýtızm aýrýyna shaldyqqan balalardyń áleýmettik qyrlaryna úńilgen gazet, Qazaqstanda osy keselge dýshar bolǵan jandardyń qamyn kúıtteıtin tıimdi kómek kórsetý júıesiniń álsizdigine nazar aýdartady.
«Álemdik statıstıka boıynsha, 2000 jyly 10 myń balaǵa shaqqanda 4-5 adamnan kelgen. Amerıkanyń syrqatty baqylaý jáne aldyn alý ortalyǵy sarapshylarynyń aıtýynsha, AQSh-taǵy 110 balanyń bireýi osy dertke dýshar bolǵan», delingen maqalada. «Qazaqstanda aýtızmge shaldyqqan balalardyń sany kúrt artqany baıqalady. Tipti kúmándi degen derekterdiń ózi bul syrqattyń qazaqstandyq balalardyń arasynda keń taralyp bara jatqandyǵyn kórsetedi. Máselen, Almaty oblystyq psıhologııalyq-pedagogıkalyq keńes berý ortalyǵynyń statıstıkalyq esebine súıensek, 2003 jyly aýtızmge shaldyqqan - 77 bala, 2006 jyly - 255 bala, 2009 jyly 326 bala tirkelipti».
Al «Aıqyn» gazeti óziniń búgingi sanynda «Retsessııa bola ma degen qaýip bar» atty maqalany oqyrmandarǵa usynyp otyr. Maqalada: «Sarapshylardyń aıtýynsha, bul jolǵy daǵdarystyń aýyly ıpoteka emes, naryqtyń ózi qaqyrap, qamystan salynǵan úı sekildi daýylǵa shydaı almaı, ushyp ketkeli turǵan syńaıly. Sheteldik sarapshylardyń pikirinshe, 2007 jyly qarsy betten turǵan jel endi baǵytyn ózgertip, jan-jaqtan úrleıtin kórinedi», dep jazady gazet.
Dúnıejúzilik banki daıyndaǵan «2011 jylǵy álemdik ekonomıkanyń jaǵdaıy men perspektıvalary» degen baıandamaǵa kóz júgirtetin bolsaq, Azııanyń damýshy elderiniń ІJÓ boıynsha kórsetkishteri 2011-2012 jylǵa qaraı 7 paıyzǵa deıin baıaýlaıtyn kórinedi. Taıaý Shyǵys pen Batys Azııa elderinde ekonomıka ósimi 4,4-4,7 paıyzǵa baıaýlamaqshy. TMD elderi men Grýzııada aldaǵy jyldary ІJÓ 3,5 paıyzǵa óspek, áıtse de, ol bıylǵy jyly 4 paıyzdaı qosqan bolatyn. ıAǵnı ósim artpaıdy, qaıta tómendeıdi degen sóz. Al damyǵan elderdiń kórsetkishteri bizdikinen de tym tómen. Mysaly, Japonııa aldaǵy jyly ishki jalpy ónimde bar bolǵany 1,1 paıyz ǵana qosady dep kútilýde. 2012-de bolsa, 1,4 paıyzǵa áýpirimdep jetpek. Al Eýrodaq elderindegi kórsetkish 2010-de - 1,3, 2012 jyly 1,9 paıyz bolmaq.
«Jýrnalıster Jerar Depardemen júzdesti» dep jazady «Astana aqshamy» basylymy. «Keshe «Qazaqstan» ortalyq zalynda rejısser Sábıt Qurmanbekovtiń «Tanaris Production» kınostýdııasy men Sh. Aımanov atyndaǵy «Qazaqfılm» AQ birlese túsirgen «Keshikken mahabbat» atty kórkem sıýjetti fılminde basty rólderde oınaǵan belgili frantsýz akteri Jerar Deparde, Bolat Qalymbetov, «Tanaris Production» kınostýdııasynyń dırektory Sergeı Ázimov, Sh. Aımanov atyndaǵy «Qazaqfılm» AQ Prezıdenti Ermek Amanshaev jýrnalısterge arnap baspasóz konferentsııasyn ótkizdi», deıdi «Astana aqshamy».
«Maǵan qazaq kınosyna túsý óte qatty unady. Óıtkeni onda shyndyq pen ómir bar. «Keshikken mahabbat» fılminiń túsirilimi barysynda qazaqstandyq akterlerge qatty baýyr basyp kettim», dep aǵynan jaryldy frantsýz akteri baspasóz jıynynda.
«Keshe Aqorda saraıynda Memlekettik hatshy - Syrtqy ister mınıstri Qanat Saýdabaevtyń tóraǵalyǵymen Qazaqstan Prezıdenti janyndaǵy Memlekettik nagradalar jónindegi komıssııanyń otyrysy bolyp ótti», dep habarlaıdy «Kazahstanskaıa pravda» basylymy. Gazettiń jazýynsha, bul otyrysta memlekettik nagradalarǵa usynylatyn tulǵalardyń tizimi jasaqtaldy. Bul jóninde tolyǵyraq «Nagrady - dostoınym» atty materıaldan oqı alasyzdar.