Kelinshektiń qos aıaǵyn julyp ketken jol apatyna baılanysty qylmystyq is qozǵaldy
ALMATY. QazAqparat - Almatyda kelinshekti qos aıaǵynan aıyrǵan jol apatyna baılanysty polıtsııa qylmystyq is qozǵady, dep habarlaıdy QazAqparat tilshisi.
Qalalyq ІІD baspasóz qyzmeti habarlaǵandaı, atalǵan derek QR QK 345-babynyń 2-bólimi boıynsha sotqa deıingi tergeý isi reestrine tirkeldi.
«Qazirgi tańda tergeý sharalary protsessýaldy is-áreket algorıtmine saı júrip jatyr. Tergeý toby kólikterdiń qalaı ornalasqanyn naqty anyqtady. Sondaı-aq, sot-medıtsınalyq, fototehnıkalyq, trasologııalyq saraptama taǵaıyndalady. Nátıjesinde bul derekke baılanysty protsessýaldy sheshim qabyldanatyn bolady»,- dedi ІІD anyqtaý basqarmasynyń basshysy Rýstam Abdrahmanov.
Aıta ketý kerek, jol apaty Ál-Farabı dańǵylynda bolǵan. Honda CRV kóligin tizgindegen qyzdar ashyq lıýkke kirip ketip, kólik dóńgelegin jaryp alǵan. Sodan jol shetine toqtap, syrtqa shyǵyp kólikterin qarap jatqan kezde ortańǵy jolaqta kele jatqan Toyota Camry kóligin avtobýs soqqan. Soqqydan Toyota Camry kóliginiń artqy bóligi ushyp kep Honda CRV kóligin soǵady. Saldarynan qyzdar ortada qysylyp qalǵan.
Qalalyq densaýlyq basqarmasynyń baspasóz qyzmeti habarlaǵandaı, eki qyzdyń biri Ortalyq qalalyq aýrýhanaǵa jetkizildi. Boıjetken mı jaraqatyn alǵan, aıaǵy synǵan. Qazir oǵan jedel ota jasaý úshin konsılıým mamandary jınaldy. Ekinshi qyz №7 aýrýhanaǵa jetkizildi. Mı jaraqatymen túsken qyz konsılıým sheshimimen neırohırýrgııa bólimine jatqyzyldy.
