Kelini men enesi pıramıdalyq shema jasaǵany úshin qamaldy

SEMEI. QazAqparat – Abaı oblysynda kelini men enesi pıramıdalyq shema jasaǵany úshin sottalyp, jazalaryn qaýipsizdigi tómen mekemede óteýge jiberildi, dep habarlaıdy QazAqparat oblystyq qylmystyq-atqarý júıesi departamentiniń baspasóz qyzmetine silteme jasap.

Enesi 2020 jyly qarjylyq (ınvestıtsııalyq) pıramıdany qurý jáne basqarý boıynsha qylmystyq is-qımyl josparyn ázirlep, oǵan kelinin tartqan. Taǵaıyndalǵan rólge sáıkes ol salymshylardy tartýǵa, olardyń tizimin qalyptastyrýǵa, saqtaýǵa mindetti bolǵan. Jınalǵan qarajattyń jáne olardy qaıta bólýdiń esebin júrgizgen.

Ekeýi WhatsApp jáne Telegram mobıldi messendjerlerinde chat quryp, onda ınvestorlardy tartý úshin marketıng túrinde aqparatty ornalastyrǵan. Depozıtter somasyn jáne qolma-qol aqshalaı tólemder somasyn anyqtaý úshin «jáshikter» qurý arqyly uıymdastyrady.

Olar 2020 jyldyń qańtar-shilde aılary aralyǵynda óz maqsattaryna jetý úshin jábirlenýshilerden ózderi qurǵan jáne basqaratyn qarjy pıramıdasyna jalpy somasy 300 mıllıonǵa jýyq teńge, ıaǵnı asa iri kólemde qarajat tartqan.

Sot ekeýin kináli dep tanyp, Qazaqstan Respýblıkasy Qylmystyq kodeksiniń 217-babynda kózdelgen jáne árqaısysyn azamattardyń qarajaty men ınvestıtsııalardy tartý jónindegi qyzmetpen aınalysý quqyǵynan 5 (bes) jyl merzimge aıyra otyryp, 5 (bes) jyl merzimge bas bostandyǵynan aıyrýǵa sottady. Qazir olar qylmystyq-atqarý júıesiniń qaýipsizdigi eń tómengi mekemesinde jazasyn ótep jatyr.