«Kelin» «Habar» telearnasynda ótetin Ermek Tursynov fılmderiniń aptalyǵyn bastaıdy
ASTANA. QazAqparat - 22 qarasha men 20 jeltoqsan aralyǵynda «Habar» telearnasynan tanymal stsenarıst jáne kınorejısser Ermek Tursynovtyń fılmderi kórsetiledi. Sizder úshin jeksenbi kúnderi - bes shyǵarmashylyq kesh, bes kınolenta jáne kınogerlermen kezdesý bolady, dep habarlady 24.kz.
Kıno álemine ózgege uqsamaıtyn ózinshe qoltańbasymen kelgen Ermek Tursynovtyń shyǵarmalyǵy jóninde kópshiliktiń pikiri áralýan. Solaı bola tura onyń túsirgen týyndylarynyń eshqaısysy eskerýsiz qalǵan emes. «Kelin» týraly kórermenniń pikiri ekige jarylsa, «Shal» fılmin synshylar qazaq kınosyndaǵy sony súrleý dep baǵalady. Bul eki týyndy da ár jyldary «Oskar» syılyǵynyń «Shet tilindegi úzdik fılm» atalymyna úmitker bolǵan. Endi onyń «Jat» fılmi osy syılyqqa usynylyp otyr. Kınotýyndy qazirdiń ózinde túrli kınofestıvaldarda júldege ıe bolyp úlgerdi. Fılm naqty oqıǵaǵa negizdelgen. Dúnıeden baz keship, taqýa bolǵan adamnyń ómirin sýretteıtin týyndynyń stsenarııin ol 25 jyl jazypty. - Bizdiń boksshylarymyz nemese dop oınaıtyn fýtbolshylarymyz olımpıadadan medal alyp jatsa, halyq bolyp qýanamyz ǵoı. Buıyryp biz «Oskardy» alyp jatsaq, búkil halqymyz qýanatyn shyǵar. Sondyqtan, basty maqsat - osy, - deıdi kınorejısserdiń ózi. 2015 jylǵy «Oskar» syılyǵynyń ıegerleri keler jyldyń aqpan aıynda belgili bolady. Al Ermek Tursynovtyń kınolarynyń kórsetilimi aıasynda shyǵarmashylyq top 5 keshti «Habar» kóremenderimen birge ótkizedi. - Ermek Tursynovpen ashyq kórsetilim aktsııasynyń basty maqsaty - kınematografııa úshi óte qundy materıaldardyń, kınolardyń bizdiń kórermenniń qaýyshýyn qamtamasyz etý. Bul qazaq kınosyn jańa bir qyrynan tanytý, - deıdi «Habar» Agenttiginiń bas prodıýseri Rınat Kertaev Sonymen, «Habar» arnasynda Ermek Tursynov fılmderiniń kórsetilimin 22 qarashada «Kelin» týyndysy bastaıdy.
