Kelimbetovtiń boljamy: rýbldiń quny túsedi
ASTANA. QazAqparat - Ulttyq banktiń basshysy Qaırat Kelimbetov Reseı rýbliniń qunsyzdanýyn boljap otyr. Bul týraly ol Jenevadaǵy Graduate ınstıtýtynda akademıkter men dıplomattardyń aldynda málimdedi, dep habarlady Forbes.kz Reuters-ke silteme jasap.
Ulttyq bank basshysynyń pikirinshe, damýshy elder aktıvteriniń jappaı satylymy, saldarynan sol elderdiń ulttyq valıýta qunynyń tómendeýi bul áli basy ǵana. Kelimbetov aǵymdaǵy jyly «devalvatsııany kóp kóremiz», al Reseı ekonomıkasynyń búgingi problemasy damýshy elderge de ortaq deıdi.
Sondaı-aq ol Qazaqstanda teńge baǵamyn retteý múmkindikteri bar, qajet bolǵanda iske kirisýge daıyn ekenin jetkizdi. Qazaqstan ekonomıkasyna áserin tıgizetin negizgi faktorlar - munaı baǵasynyń tómendeýi men reseılik rýbldiń qunsyzdanýy.
Búgin, 6 aqpanda, Kelimbetov Bazelde shetel ortalyq bankteriniń basshylarymen kezdesýdi josparlap otyr, dep jazady Reuters.
