Kelimbetov UB basshysy Aqyshevtyń usynysyn «qaýipti» dep atady
Bul jaıynda ol saıasattanýshy Dosym Sátpaev pen «Qarjylyq erkindik» qoǵamdyq qory qamqorshylyq keńesiniń basshysy Bota Jumanovaǵa bergen suhbatynda málim etti, habarlaıdy QazAqparat.
«Meniń oıymsha, bul usynys qaýipti, aıtarlyqtaı zardapsyz emes. Sebebi zeınetaqy qory aktıvteri salymynyń negizgi problemasy - ol birinshiden, joǵary ınflıatsııa. Ol eshqaıda ketken joq, sondyqtan biz targetteýge kóshtik. 6-7 paıyz - bul kez kelgen qoǵam úshin joǵary ınflıatsııa. Kez kelgen zeınetaqy qory ınflıatsııadan joǵarylaý «turýy» kerek. Ekinshiden, damymaǵan qarjy naryǵy. (...) Eger de erteń azamat aqshasyn salatyn bolsa, biraq qaıda baǵyttaıdy? Ol Ulttyq bank salyp otyrǵan memlekettik baǵaly qaǵazdarǵa salady. Eger bul sheteldegi salym retinde qarastyrylsa, onda ol sharalardy ortalyqtandyrylǵan qurylym jasaýy tıis.(...) Kezinde Dúnıejúzilik bank, ıaǵnı 2013 jyly bizge 100 paıyz shetelde ınvestıtsııalaý týraly usynys bergen. Barlyǵy dollarmen júzege asyrylady jáne eshqandaı problema bolmaıtynyn alǵa tartqan edi. Bul da qaýipti usynys. Sebebi sol kezde Qazaqstandaǵy «uzaq» aqsha qaıda degen saýal týyndaıdy. Infraqurylymdy qalaı qarjylandyramyz? Bıýdjettiń tapshylyǵyn qalaı qarjylandyramyz? «Samuryq-Qazyna» qorynyń korporatıvti oblıgatsııalaryn qalaı ınvestıtsııalaımyz?»,-dep toqtaldy Qaırat Kelimbetov.
Onyń paıymynsha, Ulttyq qordy basqarý modeli boıynsha BJZQ-ny da solaı basqarý kerek.
Esterińzge sala keteıik, taıaýda QR Ulttyq bankiniń tóraǵasy Danııar Aqyshev zeınetaqy júıesine keıbir ózgeristerdi usyndy. «Bizdiń oıymyzsha, árbir adam basqarýshy kompanııany tańdaý múmkindigine ıe bolýy úshin básekelestikti qalpyna keltirý qajet. ıAǵnı azamattar ózderiniń zeınetaqy jınaqtaryn basqartýǵa senim bildirip, sáıkesinshe, ol ınvestıtsııalaý strategııasyn tańdaı alady. Bul rette adamda tańdaý jasaý múmkindigi bolady. Eger oǵan Ulttyq bank unamasa, onda jeke kompanııaǵa bara alady. Bul biz usynyp otyrǵan bazalyq ustanym»,-dedi ol Astana ekonomıkalyq forým aıasynda ótken baspasóz máslıhatynda.