Kelimbetov «Astana» qarjy ortalyǵynyń xalyqaralyq seriktesteri týraly aıtyp berdi
ASTANA. QazAqparat - "Astana" xalyqaralyq qarjy ortalyǵynyń tóraǵasy Qaırat Kelimbetov ortalyqtyń jańa seriktesteri týraly aıtyp berdi, dep xabarlaıdy QazAqparat.
"Astana" ortalyǵy Shanxaı qor bırjasy men amerıkalyq Nasdaq Inc bırjasymen ornatylǵan áriptestikti odan ári keńeıtip, Eýropanyń eń iri bırjalarynyń birin tartýdy kózdeıdi.
"Nasdaq búginde saýda protsesterin IT-sheshimdermen qamtamasyz etýshi provaıder bolyp otyr. Sonymen qatar biz Nasdaq-ty AHQO aktsıoneri bolýǵa shaqyryp jatyrmyz", - dedi Kelimbetov amerıkalyq bıznes qaýymdastyqpen bolǵan kezdesýi barysynda tilshilerge bergen suxbatynda.
Ortalyqtyń aktsıoneri jáne strategııalyq seriktesi - Shanxaı qor bırjasy qazaqstandyq bırjany álemdik standarttarǵa saı joǵary texnologııalyq bırjalardyń birine aınaldyrýdy josparlap otyr.
"Qazir biz Eýropada eń iri ulttyq bırjalardyń birin "Astana" qarjy ortalyǵyna seriktes etý úshin kelissózder júrgizýdemiz. Bul xalyqaralyq bırjalardyń Astanadaǵy áriptestiginiń birinshi kezeńi ǵana. Kelesi kezeńde biz jahandyq ınvestıtsııalyq bankterdi jáne jahandyq qorlardy shaqyratyn bolamyz. Bul ekinshi kezeń bolady. Jyl sońynda alǵashqy nátıjelerdi jarııalaıtyn bolamyz", - dep tolyqtyrdy Qaırat Kelimbetov.
Onyń sózine qaraǵanda, Eýropanyń Qaıta qurý jáne Damý bankimen birge AHQO "jasyl" qarjylyq júıeni qurý boıynsha bas-jospar daıyndaýda. Ol Qazaqstannyń "jasyl" ekonomıkany damytý bastamalaryn qoldaýǵa jol ashpaq.
