Kelimbetov «Astana» HQO-nyń tusaýkeseri týraly aıtyp berdi
ASTANA. QazAqparat - «Astana» Halyqaralyq qarjy ortalyǵynyń resmı tusaýkeserin 2018 jyldyń 5 shildesi kúni ótkizý josparlanýda. Bul týraly búgin Úkimet úıinde ótken baspasóz máslıhatynda aıtyldy, dep habarlaıdy QazAqparat tilshisi.
«Esterińizde bolsa, biz Astanaǵa 1997 jyly jeltoqsan aıynda kóship keldik. Al kelesi jyly 5 shilde kúni elordanyń halyqaralyq tusaýkeseri ótken bolatyn. Sol sebepti «Astana» Halyqaralyq qarjy ortalyǵynyń resmı tusaýkeseri de osy kúnge belgilenip otyr», - dedi «Astana» HQO basshysy Qaırat Kelimbetov.
Onyń aıtýynsha, saltanatty shara «Astana financial days» atty úshkúndik forým aıasynda uıymdastyrylady. Sol jerde ıslamdyq qarjylandyrý, blokcheın, tsıfrlyq tehnologııalar jáne taǵy basqa máseleler keńinen talqylanady.
«Al 5 shilde kúni biz Astana ákimdigimen birlese otyryp, «Astana» Halyqaralyq qarjy ortalyǵynyń tanystyrylymyn ótkizýdi josparlap otyrmyz. Búginde arnaıy komıssııa da quryldy. Memleket basshysy Nursultan Nazarbaev álemniń jetekshi ınvestorlaryn shaqyrdy. Prezıdenttiń ózi qatysady degen jospar bar», - dep atap kórsetti Q.Kelimbetov.
Aıta keteıik, «Astana» HQO aǵymdaǵy jyly 1 qańtardan bastap óz jumysyna kirisken bolatyn. Ortalyq negizinde sot pen arbıtraj apparaty quryldy. Memleket basshysynyń qaýlysymen sot tóraǵasy da taǵaıyndaldy. Odan bólek, taǵy 9 sýdıa bar. Bırjanyń negizgi áriptesteri de anyqtaldy.
