Kelimbetov «Astana» HQO-nyń bes strategııalyq baǵytyn atady
Qaırat Kelimbetovtyń aıtýynsha, «Astana» HQO-syn aımaqtaǵy basty qarjylyq ortalyq retinde kórsete bilý úshin bes strategııalyq baǵytty júzege asyrý kerek.
«Bizdiń strategııalyq damýdyń negizgi bes baǵytyn, ıaǵnı bes basymdyqty atap óteıin. Bul álemdik qarjy salasynda dástúrli bolǵanymen, qarjylyq ındýstrııa Qazaqstanda asa damymaǵan sala. Aldymen - «Kapıtal naryǵy». Onyń ádettegi ataýy - Qor naryǵy. Demek, Qazaqstanda jáne aımaqta qor naryǵy damymaǵandyqtan, «Astana» HQO osy salany órkendetýdi maqsat tutady», - deıdi «Astana» halyqaralyq qarjy ortalyǵynyń basqarýshysy.
Qaırat Kelimbetov budan keıingi eki baǵyt - «Aktıvterdi basqarý» men «Private Banking» strategııalyq baǵyttary ekenin atap ótti.
«Olar arqyly sheteldik mamandardy, kompanııalardy tarta otyryp, Qazaqstanda qarjy ındýstrııasyn damytýdy kózdeımiz. Іri baǵyttardyń taǵy biri - «Islam qarjylandyrýy» bolmaq. Jalpy, Qazaqstan Islam qarjylandyrýynyń pıoneri sanalady. Zańnamaǵa engizilgen ózgeristerdiń arqasynda Qazaqstan Islam qarjylandyrýy salasynda óte úlken qadam jasap úlgerdi. Sonymen qatar, baǵyttardyń sońy retinde «Jańa qarjylyq tehnologııalardy» basymdyq retinde belgileýge eshkimniń talasy joq degen oıdamyz», - dep túıdi Qaırat Kelimbetov.
Aıta ketsek, búgin Parlament Senatynyń Qarjy jáne bıýdjet, Ekonomıkalyq saıasat, ınnovatsııalyq damý jáne kásipkerlik komıtetteri «Astana» halyqaralyq qarjy ortalyǵynda kóshpeli otyrys ótkizdi. Senattyń Qarjy jáne bıýdjet komıtetiniń tóraıymy Olga Perepechına ekonomıkalyq ınnovatsııalyq damýda, azamattardyń ál-aýqatyn arttyrýda jáne Qazaqstandy damyǵan 30 eldiń qataryna engizý jolynda «Astana» halyqaralyq qarjy ortalyǵyna erekshe mindet júktelip otyrǵanyn atap ótti.
