Kelestik turǵyn sharýalarǵa qajetti kólik qurastyryp shyǵardy
TÚRKІSTAN. QazAqparat - Abzal esimdi kelestik sharýa ózine qajetti tehnıkalardy qoldan jasap alady. Máselen, aýlasyndaǵy qora-qopsyny ózi jasaǵan kishkentaı traktormen tazalaıdy. Jem maıdalap, shóp týraý úshinde qoldan jasaǵan qurylǵylaryna senim artady, dep habarlaıdy QazAqparat tilshisi.
Keles aýdany Aqtóbe aýyldyq okrýgine qarasty Lesbek batyr eldi mekeniniń turǵyny Abzal Jasuzaq aýyl sharýashylyǵyna qajetti «temir tulpar» qurastyryp shyǵardy. Ol bul tehnıkany jasaýǵa alty aı ýaqyt jumsapty. Shaǵyn ǵana jańa tehnıka mal sharýashylyǵymen aınalysatyn qojalyqtar úshin taptyrmas qural bolǵaly tur. Sebebi, kólik júk artýǵa, qora tazalaýǵa jáne tıelgen júkti tasymaldaýǵa óte qolaıly.
«Traktorǵa «ýaz» markaly kóliktiń qurylǵylaryn ornattym. 4 dóńgelegi de tartady. Rýli jeńil bolý úshin, Mersedes kóliginiń qosalqy bólshekterin aldym. Qoraǵa kirip shyǵýǵa yńǵaıly bolý úshin kabına jasaǵan joqpyn. Shaǵyn ǵana kólikpen qora-jaılarda erkin qozǵalýǵa bolady. Maldyń qıyn jınap alyp, artyp kete beremin», - deıdi ol.
Abzal budan buryn da óziniń sheberligimen jerlesterin tań qaldyryp kelgen. Máselen, keńestik kezeńdegi eski júk kóligin jetildirgen. Oǵan sheteldik qurylǵylardy jalǵap, zaman talabyna sáıkestendiripti. Maıdy az jaǵyp, kúshin kóbeıtken. Sondaı-aq, shópti nyǵyzdaıtyn, týraıtyn apparatty da ózine yńǵaıly etip, ózgertip alǵan. Qazir artyq kúsh jumsamaıdy. Elektr qýatyna qossa boldy, apparatpen qajetti jem-shópti daıyndaýǵa múmkindik kóp. Al, aldaǵy ýaqytta jer jyrtatyn, shóp jınaıtyn kólikti qoldanysqa engizbek.
«Sharýashlyqtan qol bosaǵan kezde temirden tyń dúnıeler jasaýǵa qyzyǵamyn. Іnilerim men dostarym kómektesedi. Zattardy Shymkenttegi kólik quraldaryn satatyn dúkenderden alamyn. Al, jumysty dánekerleýshi apparatpen jasap shyǵamyn. Satyp alǵysy keletinder kóp. Biraq bul dúnıeniń barlyǵy maǵan kerek. Sondyqtan satý oıymda joq», - deıdi ol.
Abzal jaqynda qurastyrǵan kóligine SherAz degen ataý berdi. Bul «Sheber Abzal» degen maǵynany bildiredi. Al, avtorlyq quqyǵyn saqtaý úshin aldaǵy ýaqytta arnaıy patent alýda josparlap otyr.
