Kelestik kásipker Afrıka jaıynyn ósirýdi qolǵa aldy
KELES. QazAqparat - Túrkistan oblysy, Keles aýdanyndaǵy kásiporyndardyń biri balyqtyń jańa túrin ósirýdi qolǵa aldy. «Afrıka jaıynyn» kóbeıtýdi kózdegen jeke kásipker jylyna 160 tonna jańa balyq tuqymyn alýdy josparlap otyr, dep habarlaıdy QazAqparat tilshisi.
Qoshqarata aýyldyq okrýgindegi «Bıjigit-Ata» JShS aq amýr, kúmis sazan, kókserke balyq túrleriniń árqaısysynan jylyna 10 tonna ónim alady. Ýyldyryqtardy qoldan uryqtandyrý, balyq ósirý jáne balyq etin óńdeýmen aınalysatyn joba aıasynda 15 azamat turaqty jumyspen qamtylǵan. Jalpy aýmaǵy 600 sharshy metr jerde ornalasqan kásiporynda jylyna 300 tonnaǵa deıin taýarly balyq ósirý josparlanǵan.
«Balyqty kútip baptaıtyn mamandy Ózbekstan elinen arnaıy aldyrdyq. Qazirde «afrıkalyq som klarıevyı» túrin ósirýdemiz. Ereksheligi ár 2-3 aıda ýyldyryq jınap otyrady. Shabaqty ósip jetilgenshe, 6-7 aı osy basseınde qajetti temperatýrany saqtap, ósiremiz. Sosyn úlken kólge tastaımyz. Ol kólde 3-4 aı baǵylyp, tutynýǵa jaraıdy. Búginde kórshi elderden 1000 tonnaǵa deıin tapsyrys túsýde», – deıdi kásipker Nurbol Januzaqov.
Tropıkalyq balyqty ósirý úshin aıryqsha kútim qajet. Balyq baǵyp, tabys taýyp otyrǵan isker azamat bul jobanyń ázirge tek tájirıbe retinde qolǵa alynǵanyn aıtady.
