Keleste jasóspirimderdiń ýaqytyn tıimdi ótkizý máselesi talqylandy
KELES. QazAqparat – Túrkistan oblysy Keles aýdanynda kámelet jasyna tolmaǵandardyń quqyǵyn qorǵaý jónindegi aýdandyq komıssııanyń keńeıtilgen májilisi ótti, dep habarlaıdy QazAqparat tilshisi.
Jıynǵa aýdan ákimi A.Esbaev pen aýdannyń prokýrory B.Seıfolla, aýdandyq polıtsııa bóliminiń bastyǵy Sh.Ońǵarov pen mektep dırektorlary jáne tárbıe isi jónindegi orynbasarlary qatysty.
Aýdan ákimi tóraǵalyq etken otyrystyń kún tártibinde 3 másele qaraldy. Kámeletke tolmaǵandar arasyndaǵy quqyq buzýshylyqtyń aldyn alý boıynsha atqarylǵan jumystar men aýdan ákimdigi janynan qurylǵan komıssııanyń 8 aıda atqarǵan jumysy talqylandy. Sondaı-aq, «Jastar resýrsty ortalyǵy» MKK basshysy E.Bektaevtyń jumys esebi tyńdaldy.
Jıynda sóz alǵandar jasóspirimder arasynda oryn alǵan qylmystarǵa sebep bolǵan máselelerdi kóterip, olardy sheshý jóninde usynys-pikirlerin ortaǵa saldy. Qylmysty boldyrmaý jáne aldyn alý jumystaryn pysyqtap, minezi qıyn balalarmen kóbirek jumys isteý kerektigin sóz etti.
«Mundaı basqosýlar bos sóz bolmaýy tıis. Kámelet jasyna tolmaǵan balalardyń bos ýaqyty kóp. Sondyqtan, olar quqyq buzýshylyq, zorlyq-zombylyq, ózin-ózi óltirý sekildi áreketterge barady. Aýdandar men aýyldarda balalardyń ýaqytyn tıimdi ótkizetin úıirmeler joq. Biz olardyń qyzyǵýshylyǵyn arttyratyn, tulǵa retinde qalyptasýyna áser etetin sport keshenderin, úıirmeler, qosymsha bilim beretin kýrstar ashýymyz kerek», - dedi jıyndy qortyndylaǵan aýdan ákimi Aqmentaı Esbaev.
