Keleste týǵan 8 jasar qyz bıyl ǵana Qazaqstan azamattyǵyn aldy
KELES. QazAqparat - Túrkistan oblysynda 8 jasar qyz Qazaqstan Respýblıkasynyń azamattyǵyn aldy, dep habarlaıdy QazAqparat.
Keles aýdandyq polıtsııa bólimine jergilikti turǵyn ótinishpen kelgen. Áıeldiń aıtýynsha, ol 2013 jyly otbasymen Ózbekstan Respýblıkasynan Qazaqstanǵa kóship kelgen.
Sodan QR azamattyǵyn alý úshin qujattaryn 2013 jyldyń sońynda ótkizgen.
Alaıda qujattardy qaraý merziminde 2014 jyldyń basynda bosanyp, osy aralyqta jańa týǵan sábıdiń qujatynda ata-anasy ózbekstandyq dep jazylyp ketken.
Muny baıqamaǵan ata-anasy birneshe jyldan keıin Ózbekstanǵa ótýge arnalǵan qujatty daıyndaý kezinde ǵana jaǵdaıdy bilgen.
Sondyqtan kelestik polıtseılerge ótinish jasap, 8 jasar qyzyna qazaqstandyq degen anyqtama berýdi suraıdy.
Turǵynnyń ótinishi boıynsha Keles APB kóshi-qon qyzmeti tobynyń ınspektory polıtsııa maıory Gúljan Quralbekova jumys júrgizedi. «QR azamattyǵy týraly» Zańynyń 22-babyna sáıkes, Aıym Ýrmanova esimdi kishkentaı qyzǵa QR-nyń azamaty degen tıisti anyqtama berildi.
