Keleste memlekettik qyzmetker sýǵa sekirgen qyzdy qutqaryp qaldy
TÚRKІSTAN. QazAqparat – Túrkistan oblysy Keles aýdanynda memlekettik qyzmetker sýǵa batyp ketken boıjetkendi qutqaryp qaldy. 19 jastaǵy qyz sýǵa sekirip, sýıtsıd jasamaq bolǵan, dep habarlaıdy QazAqparat tilshisi.
Oqys oqıǵa keshki saǵat 18:00 shamasynda Abaı – Birtilek aýyldarynyń arasyndaǵy beket mańynda bolǵan. «Oshaqty» kanalynda qyz bala ózin sýǵa tastap jibergen. Sol mezette Keles aýdandyq ákimdiginiń jetekshi mamany Beksultan Arapbaı qyzdyń sýǵa ketkenin baıqap qalady. Dereý sýǵa sekirip, qatty aǵyspen aǵyp bara jatqan qyzdy ajal aýzynan aman alyp qalǵan.
«Men qyzdy qutqarmaq bolyp sýǵa sekirgende, ol esin joǵaltyp alǵan. Kanaldyń túbine batyp bara jatqan edi. Der kezinde sýdan shyǵaryp, alǵashqy kómek kórsettik», -deıdi Beksultan Ǵabıddınuly.
Keıinnen málim bolǵandaı, sýǵa túsken qyz bala epılepsııa aýrýymen aýyratyn bolyp shyqty. Ol ózin jaısyz sezinip, sýǵa sekirip ketken. Adamdardyń qaýipsizdigin saqtaýda baqylaý jasaǵan Beksultan Arapbaı jas qyzdyń ómirin saqtap qaldy. Osylaısha, óz ómirin qaterge tigip, órimdeı qyzdy ajaldan arashalap qalǵan azamatqa boıjetkenniń ata-anasy men aǵaıyn-týystary alǵystaryn bildirdi.
