Keleste Qyzyl kitapqa engen balyqty aýlaǵan brakonerler sottaldy
TÚRKІSTAN. QazAqparat - Keles aýdanynda zańsyz balyq ustaǵan brakonerler zań aldynda jaýap berdi, dep habarlaıdy QazAqparat Túrkistan oblystyq polıtsııa departamentiniń baspasóz qyzmetine silteme jasap.
Naýryz aıynda Keles aýdanynda zańsyz balyq ustaýshylardy anyqtaýǵa arnalǵan «Birlesken tabıǵatty qorǵaý» jedel aldyn alý is sharasy ótken bolatyn. Ony «Ohotzooprom» ÓB respýblıkalyq memlekettik qazynalyq kásiporny, Túrkistan oblysy orman sharýashylyǵy jáne janýarlar dúnıesi aýmaqtyq ınspektsııasy men Keles aýdandyq polıtseıleri birlesip ótkizgen bolatyn. Onyń barysynda birqatar zańbuzýshylyqtar anyqtaldy.
«Keles aýdanyna qarasty Shardara sý qoımasynyń aıdynynan zańsyz balyq aýlaǵan azamattar ustaldy. Іs-sharaǵa tyńǵylyqty ázirlikpen shyqqan saqshylar 2 brakonerdiń zańsyz áreketiniń ústinen tústi. Arnaıy tekserý kezinde belgili bolǵandaı, olardyń janynda rezeńke qaıyq pen balyq aýlaýǵa arnalǵan zattar bolǵan. Al, qaıyqtyń ishin tekserý barysynda sym jalǵanǵan arnaıy elektr súzgish, arnaıy jaryq bergish quraly men Qyzyl kitapqa engen birqatar balyq túrleri anyqtalyp,tárkilendi» delingen habarlamada.
Zańsyz balyq aýlaǵany úshin ustalǵan eki azamattyń jumyssyz, jergilikti turǵyn ekeni belgili boldy. Atalmysh jaıtqa baılanysty QR Qylmystyq kodeksiniń 335-baby boıynsha qylmystyq is qozǵalyp, tergep-tekserý amaldary júrgizildi. Nátıjesinde, brakonerlerdiń aldyn ala sóz baılasý arqyly aram pıǵylyn iske asyrǵany anyqtalyp, is sotqa joldanǵan.
Keles aýdandyq sotynyń sheshimimen zańdy belshesinen basqan balyqshylar 2 jylǵa balyq aýlaý quqyǵynan aıyrylyp, 1 jyl merzimge bas bostandyǵy shekteldi.
