Keleste quny 1,1 mlrd dollar bolatyn elimizdegi eń iri jylyjaı salynady
Kezdesýge Túrkistan oblysynyń ákimi Ómirzaq Shókeev pen «Kazakh Іnvest» ulttyq kompanııasy Túrkistan oblysy boıynsha fılıaly dırektorynyń orynbasary Qydyr Kaıýpov, Keles aýdany ákiminiń orynbasary Abaı Jańbyrbaev pen tıisti mekeme basshylary qatysty. Reseılik «Eko-kýltýra» kompanııasynyń ókilderi tanysý barysynda aýdannyń geografııalyq tıimdi ornalasqanyn atap ótip, keshenniń ınfraqurylym júıesin júrgizý jumystaryn bastaýǵa ýaǵdalasty. Joba 2025 jylǵa deıin júzege asyrylsa, aýdannyń ekonomıkasyn kóterip, jańadan 10 myń jumys orny ashylady.
«Bul jerdi tańdaýdyń da óz ereksheligi bar. Munda Qazaqstan boıynsha kún erte shyǵyp, jándikter erte oıanady. Eldegi eń ystyq núkte sanalady. Bul óz kezeginde jylyjaıǵa jumsalatyn shyǵyndy azaıtady. Keshenniń janynan «Qyzyl ásker» postanstansasy ashylyp, 2021 jyldan bastap jaryqpen qamtamasyz ete alady. Gaz tartylǵan jáne osy jerden úlken aınalma joly túsedi dep josparlanyp otyr. Transporttyq logıstıkalyq másele sheshiledi»,- deıdi oblystyq aýyl sharýashylyǵy basqarmasynyń basshysy Nurbek Badyraqov.
Atalǵan keshendi salý boıynsha QR Premer-Mınıstri Asqar Mamınniń Túrkistan qalasyna sapary aıasynda memorandým túzilgen bolatyn. «Kazakh Іnvest» kompanııasynyń bastamasymen Túrkistan oblysynyń ákimdigi jáne «Eko-kýltýra» reseılik kompanııasy arasyndaǵy kelisim túzilip, jylyjaı kesheninde aldaǵy ýaqytta qyzanaq, qııar ónimderi óndirilmek. 2019-2025 jyldary salynatyn keshenniń ónimderi TMD men Eýropa elderine eksporttalmaq. Jylyjaıdyń 25 paıyzy memleket tarapynan sýbsıdııalanatyn bolady. Qajetti janar-jaǵarmaı sharýalarǵa beriletin arzan baǵamen bosatylyp, tuqym alýǵa da sýbsıdııa beriledi. Sýlandyrý jumystary jer asty drenajdar jáne Keles ózeninen sý tartý arqyly júrgiziledi.
«Osyndaı úlken jobany iske asyrý týraly usynysy Kazakh Invest-ten tústi. Bizge bul bastamany qolǵa alý buıyrdy. Árıne, biz Qazaqstanda jobalardy júzege asyramyz, biraq olar sonshalyqty aýqymdy emes. Atalǵan keshenge jylyna 7 mln tekshe metr sý men saǵatyna 100 tekshe metr gaz, táýligine 40 mgvt jaryq qajet. Bıyl barlyq ınfraqurylymdardy tartý máselesi sheshilse, kelesi jyldan bastap 50 gektar jerge kókónis ósirýdi qolǵa ala bastaımyz. Jobany júzege asyrý 6 jyl kóleminde júredi. Jylyjaı tolyqtaı gollandııalyq ozyq tehnologııamen salynady»,- deıdi «Eko-kýltýra» agrokesheni holdınginiń prezıdenti Aleksandr Rýdakov.
Aıta keteıik, oblys halqyn jumyspen qamtý jáne ozyq tehnologııalardy ıgerý boıynsha óńirde 480 joba qolǵa alynyp jatqan bolsa, sonyń 24-i jylyjaılarǵa qatysty bolyp otyr.
