Keleste kópbalaly otbasy AÁK qarjysyna bódene ósirip, tabys taýyp otyr
KELES. QazAqparat - Túrkistan oblysy Keles aýdany Abaı aýylynyń turǵyny Áıgerim Álimbekova ataýly áleýmettik kómektiń arqasynda kásibin dóńgelentip otyr, dep habarlaıdy QazAqparat.
Óńirlik kommýnıkatsııalar qyzmetiniń málimetinshe, Túrkistan oblysy Keles aýdanynda turatyn 5 balanyń anasy Áıgerim Álimbekova byltyr ataýly áleýmettik kómektiń arqasynda 1 mln 389 myń teńge kóleminde qarjy alǵan. Oǵan úı aýlasynan qus sharýashalyǵyn ashqan. Búginde úıelmen 100 bódene men 50 taýyq asyrap otyr. Budan bólek, bıyl taǵy da 100 bas balapan bastyryp jatyr eken.
«Ataýly áleýmettik kómektiń sharapaty mol boldy. Bala-shaǵamyzdyń nesibesine úkimet qarasyp, mol qarjy berdi. Sonyń shashaýyn shyǵarmaı, kúıeýim ekeýmiz jeke kásip ashýdy oılastyrdyq. Búginde turmysymyz jaqsy, tabysymyz da jyl sanap molaıyp keledi. Endigi armanym – qus sharýashylyǵyn ulǵaıtyp, qus basyn 500 danaǵa jetkizý», – deıdi Áıgerim Álimbekova.
Abaı aýylynda bódene jumyrtqasyna suranys mol. Ásirese, bazardaǵy saýda dúkenderi men ashanalar tapsyrysty kóp beretin kórinedi.
Biraq, Áıgerim Álimbekova qus ósirýdiń ózindik qıyndyqtary bar ekenin de jasyrmady. Arnaıy taýyq qoranyń da qajettiligi týyndapty.
Aldaǵy ýaqytta ol úı aýlasynan arnaıy qora salyp, qus sanyn 1000-ǵa jetkizemin dep otyr.
