Keleste alǵashqy qarbyzdar satylymǵa shyqty
TÚRKІSTAN. KAZINFORM — Túrkistan oblysy Keles aýdanynda qarbyz maýsymy erte bastaldy.
Bozaı aýyldyq okrýgine qarasty Tartoǵaı eldi mekenindegi «Júsipbek» sharýa qojalyǵy alǵashqy ónimin naryqqa shyǵardy. Sharýa qojalyq bıyl 25 gektar sýarmaly alqapqa qarbyz ekken. Zamanaýı agrotehnologııalar men tamshylatyp sýarý ádisin qoldaný nátıjesinde ónim jyldaǵydan bir apta buryn pisip jetildi.
— Qarbyzdardyń ortasha salmaǵy — 10 keli, al eń irileri 15 kelige deıin jetedi. Qazirgi tańda ónimniń kelisi 200 teńgeden satyp jatyrmyz, — deıdi sharýa Júsipbek Áshirbekov.
Qojalyq maýsym kezinde aýyl turǵyndaryn da jumyspen qamtyp otyr. Munda kúnine 40-qa jýyq adam maýsymdyq jumystarǵa tartylǵan. Bul aýyl halqy úshin tabys kózi bolsa, kásip ıesi úshin — ónimdilikti arttyrýdyń bir joly.
Aıta keteıik, ótken jyly Keles aýdanynda 22 871 gektar jerge aýyl sharýashylyǵy daqyldary egilip, jalpy ónim kólemi 70,1 mlrd teńgeni quraǵan. Al bıylǵy jyldyń alǵashqy úsh aıynda bul kórsetkish 7,6 mlrd teńgege jetti. Sondaı-aq, jańbyrlatyp sýarý tehnologııasy da keńinen engizilgen.
Eske sala keteıik, budan buryn Jetisaıda qaýyn piskenin jazǵan bolatynbyz.