«Kelesim - atamekenim» atty ánshiler men sazgerler baıqaýy ótti
KELES. QazAqparat – Túrkistan oblysy Keles aýdanynda «Kelesim - atamekenim» atty ánshiler men sazgerler baıqaýy bolyp ótti. Aýdan ákimdiginiń uıymdastyrýymen ótken sharaǵa 12 aýyldyq okrýgten 33 sazger men ánshi qatysty, dep habarlaıdy QazAqparat tilshisi.
Elbasynyń «Bolashaqqa baǵdar: Rýhanı jańǵyrý» baǵdarlamalyq maqalasynyń «Týǵan jer» baǵdarlamasy aıasynda uıymdastyrylǵan baıqaýda kıeli Keles óńirine arnalǵan ánder aıtyldy.
Baıqaýdyń maqsaty - shalǵaı aýyldardaǵy talantty jastardy anyqtaý men kelestik kompozıtorlardyń Keles jaıly jazylǵan ánderin nasıhattaý, olardy halyq arasynda keńinen tanytý.
Mádenı shara barysynda aýdan ákiminiń orynbasary A. Seksenbaev quttyqtaý sóz sóılep, qatysýshylarǵa sáttilik tiledi. Baıqaý qortyndysy boıynsha Júzimdik aýyly atynan qatysýshy úmitker Zamanbek Nurhanov Baqythan Sultahanovtyń sózine jazylǵan Ábdimálik Tastemirovtyń «Qut mekenim - Aq Keles» ánimen І oryndy ıelendi. Jańadáýir aýylynyń namysyn qorǵaǵan Aınur Asqar Asqar Mamyrbaevtyń «Kelesim» ánin oryndap, ІІ orynǵa laıyqty dep tanyldy. Al, Júzimdik aýylynyń ókili Jandarbek Qaıyrbekov Bahythan Sultahanovtyń sózine jazylǵan Ábdimálik Tastemirovtyń «Kelestiń jaqut túnderi-aı» ánimen ІІІ oryndy ıelendi.
Sazgerler boıynsha «Kelesim» ánimen Asqar Mamyrbaev І oryndy jeńip aldy. ІІ oryn Bahythan Sultahanovtyń sózine jazylǵan «Qut mekenim - Aq Keles» ániniń avtory Ábdimálik Tastemirovke buıyrdy. Júldeli ІІІ oryndy Bahythan Sultahanovtyń sózine jazylǵan «Meniń syrly Kelesim» ánimen Meraly Smaılov ıelendi.
Baıqaýda júldeli oryn ıegerlerine aýdan ákiminiń arnaıy dıplomy jáne baǵaly syılyqtar tapsyrylyp, qatysýshylarǵa aýdandyq mádenıet úıi dırektory atynan dıplom men yntalandyrý syılyqtary úlestirildi.
