Kelesi jyly jol qurylysy salasyndaǵy qazaqstandyq qamtý kólemi 100 paıyzdyq mejege jaqyndaıdy

Bul týraly búgin avtojol salasynyń ókilderimen ótken jıynda QR Kólik jáne kommýnıkatsııa vıtse-mınıstri Roman Sklıar málim etti.

«2011 jyldyń qorytyndysy boıynsha respýblıkalyq joldarda paıdalanylǵan materıaldardaǵy qazaqstandyq qamtýdyń úlesi 86 paıyzdy qurady. Bizdiń paıymymyzsha, tómen tsıfrdiń qalyptasýyna Reseıden ımporttalatyn bıtýmdy, tsellıýloz qospalardy, sonymen qatar termoplastıkalardy paıdalaný sebep boldy», - dedi ol.

Onyń atap ótýinshe, aǵymdaǵy jyly Pavlodar munaı óńdeý zaýytynan 200 myń tonna otandyq bıtým shyǵarý josparlanyp otyr. Onyń 150 myń tonnasy respýblıkalyq joldardy salýǵa nemese jóndeýge jumsalmaq. Atalǵan materıaldy qajetti jerge der ýaqytynda jetkizý úshin «Qazaqstan temir joly» kompanııasy tasymal jasaıtyn vagondarmen tolyq qamtamasyz etpek. «Osylaısha aǵymdaǵy jyly qazaqstandyq qamtý úlesin biz 89 paıyzǵa deıin ulǵaıtýdy josparlap otyrmyz. Al keler jyly Aqtaý bıtým zaýytyn iske qosýdyń arqasynda bıtýmǵa degen ishki qajettilik tolyq qamtamasyz etiledi jáne qazaqstandyq qamtý úlesi 100 paıyzdyq mejege jaqyndaıdy», - dedi ol.

Sonymen qatar R.Sklıardyń aıtýynsha, aǵymdaǵy jyly Pavlodar men Almaty qalalarynda termoplastık shyǵarý isin jolǵa qoıǵannan keıin ımporttalatyn atalǵan materıal kólemi aıtarlyqtaı tómendeıtin bolady.

Jalpy ótken jyly avtojol salasyn damytýǵa 258 mlrd. teńge bólingen bolatyn. Onyń 189,6 mlrd. teńgesi respýblıkalyq joldy damytýǵa, al 68,4 mlrd. teńgesi jergilikti joldarǵa bólindi. Bólingen qarjynyń aıasynda 5 myń shaqyrymnan astam jol jóndeldi.