Kelesi jyly Jezqazǵanda kópqabatty turǵyn úılerdiń qurylysy bastalady
ASTANA. QazAqparat - Jezqazǵanda 10 jylǵa jýyq ýaqyt boıy turǵyn úıler salynbaǵan. Ol jaıly búgin oblys ákimdiginde ótken apparattyq jınalys barysynda aıtyldy.
Oblys ákiminiń birinshi orynbasary Asylbek Dúısebaevtyń aıtýynsha, bıylǵy jyly Jezqazǵan qalasynda nesıe arqyly satylatyn kópqabatty turǵyn úıdiń qurylysyn bastaý jospary bolǵan edi. Alaıda ol jospar júzege aspady.
«Basqa qalalarda, mysaly, Balqashta eki úıdiń qurylysy bastalyp ketti. Qaraǵandyda da osy baǵytta jumystar jalǵasyp jatyr», - dedi Asylbek Dúısebaev.
«Qandaı sebepterge baılanysty Jezqazǵanda bul jumystar toqtatylyp tur?» - dep surady aımaq basshysy Erlan Qoshanov Jezqazǵan qalasynyń ákiminen.
Batyrlan Ahmetovtyń aıtýynsha jobalyq-smetalyq qujattar daıyn. Jáne de osy jyldyń sońyna qaraı Jezqazǵan shaharynda qurylys jumystary bastalady.
«Jańa úılerdiń birinde jalǵa beriletin páterler bolsa, kelesi birinde nesıelik úıler bolady. Jyl sońyna deıin sonymen qatar taǵy da tórt úıdiń jobalyq-smetalyq qujattary daıyn bolady», - dep sendirdi Jezqazǵan qalasynyń ákimi.
Jalpy eseptegende 2018 jyly Jezqazǵanda alty jańa kópqabatty úıdiń qurylysy júrgiziledi. Sondaı-aq, qala ákiminiń aıtýynsha taǵy úsh úıdi jeke kompanııa salýdy josparlap otyr, ondaǵy páterlerdi «Turǵynúıjınaqbanki» nesıesi arqyly alýǵa bolady.
Eger barlyǵy jospar boıynsha júzege assa, onda 2019 jyly Jezqazǵanda toǵyz jańa kópqabatty úıler paıda bolady. Onda halyqtyń áleýmettik turǵydan osal toptaryna baspana qarastyrylady.
Oblys ákimi Erlan Qoshanov óziniń birinshi orynbasaryna qaladaǵy turǵyn úı máselesin baqylaýda ustaýdy tapsyrdy.
Statıstıka basqarmasynyń málimetinshe, 2017 jyldyń 1 qańtaryna deıin Qaraǵandy oblysyndaǵy turǵyn úı qorynyń jalpy aýdany ótken jylmen salystyrǵanda 136,8 myń sharshy metrge ulǵaıǵan.
