Kelesi jyly respýblıkalyq bıýdjet kirisi 13,9 trln teńge bolady
«Respýblıkalyq bıýdjet pen Ulttyq qordyń kelesi úshjyldyqqa arnalǵan parametrlerin qalyptastyrý kezindegi negizgi leıtmotıv Memleket basshysynyń únemdi jáne jaýapty bıýdjet saıasaty tujyrymdamasyn qamtamasyz etý boıynsha qoıǵan mindetterin iske asyrý boldy. Osylaısha, 2023-2025 jyldarǵa arnalǵan respýblıkalyq bıýdjettiń parametrleri bıýdjet saıasatynyń kiris bazasyn tolyqtyrýdyń jańa kózderin jınaqtaý jáne bıýdjet shyǵystaryn áleýmettik-ekonomıkalyq damýdyń basym baǵyttaryna shoǵyrlandyrý baǵdaryn eskere otyryp aıqyndalǵan. Sondaı-aq keńeıtilgen shoǵyrlandyrylǵan bıýdjetti jáne bıýdjettik táýekelder týraly, memlekettik qarjynyń uzaqmerzimdi turaqtylyǵy týraly esepti engizý boıynsha qabyldanǵan jańalyqtar da ımplementatsııalanǵan. Memlekettik qarjyny basqarýdyń 2030 jylǵa deıingi tujyrymdamasy ázirlendi. Onda memlekettik qarjy júıesin odan ári damytýdyń negizgi tásilderi aıqyndalǵan», - dedi vıtse-mınıstr.
Onyń atap ótýinshe, 2023 jyly respýblıkalyq bıýdjettiń kirisi boljam boıynsha osy jyldyń naqtylanǵan josparynan 37 paıyzǵa ósip, 13,9 trln teńge nemese JІÓ-ge qatysty 11,5 paıyz boldy.
Josparly kezeńde olardyń 2025 jylǵa qaraı 16,3 trln teńgege deıin ósimi kútiledi.
«Respýblıkalyq bıýdjetke túsetin qosymsha túsimder kiris bazasyn keńeıtý jáne salyqtyq ákimshilendirýdi jaqsartý, sondaı-aq kóleńkeli ekonomıkanyń úlesin azaıtý boıynsha Úkimet qabyldap otyrǵan is-sharalar esebinen qamtamasyz etiledi», - dedi ol.
Azamat Ámrın dereginshe, bıýdjettiń menshikti qarajatynyń úlesi úsh jyldyq kezeńde 2023 jylǵy 70 paıyzdan 2025 jyly 75 paıyzǵa deıin artady.
«Respýblıkalyq bıýdjet shyǵystary 2023 jylǵy 21 trln teńgeden 2025 jyly 22,7 trln teńgege deıin birtindep ulǵaıady dep boljanýda. JІÓ-ge qatysty olardyń 2023 jylǵy 17,4 paıyzdan 2024-2025 jyldary 16-15,5 paıyzǵa deıin tómendeýi boljamdalǵan. Tutastaı alǵanda, kontrtsıkldyq bıýdjet qaǵıdasyn qoldaný respýblıkalyq bıýdjet shyǵystarynyń ósý qarqynyn josparly kezeńde JІÓ-ge qatysty 16,4 paıyz deńgeıinde turaqtandyrýdy qamtamasyz etedi. Osy shyǵystar lımıti aıasynda strategııalyq jáne bıýdjettik josparlaýdyń ózara baılanysyn birtindep kúsheıte otyryp, shyǵystardy áleýmettik-ekonomıkalyq damýdyń basym baǵyttaryna shoǵyrlandyrý qamtamasyz etiledi. Máselen, 2023-2025 jyldarǵa arnalǵan respýblıkalyq bıýdjet jobasy boıynsha strategııalyq baǵyttardy iske asyrýǵa arnalǵan respýblıkalyq bıýdjet shyǵystarynyń úlesi memlekettik organdardyń erejesinde aıqyndalǵan ózge de mindetterdi sheshýge baǵyttalǵan turaqty sıpattaǵy shyǵystardy qospaǵanda, shyǵystardyń jalpy kóleminiń 60 paıyzyna jetedi», - dedi vıtse-mınıstr.
