Kelesi jyly memlekettik energetıkalyq reestr sýbektileri 40 myńǵa jetedi

ASTANA. QazAqparat – Elimizde memlekettik energetıkalyq reestr sýbektileri energııa únemdeý salasyna 350 mlrd teńgeden astam ınvestıtsııa quıdy. Sonyń nátıjesinde shamamen 88 mlrd teńge únemdeldi. Bul týraly Elektr energetıkasyn damytý jáne energııa únemdeý ınstıtýty AQ basqarma tóraǵasy Baýyrjan Smaǵulov málim etti, dep habarlaıdy QazAqparat tilshisi.

«Energııa únemdeý jáne onyń tıimdiligin arttyrý saıasatyn iske asyrý maqsatynda Japonııanyń tájirıbesi boıynsha 2013 jyly memlekettik energetıkalyq reestr quryldy. Sodan beri memlekettik energetıkalyq reestr aıasynda 80 myńnan astam uıym men kásiporyn qyzmetine monıtorıng jasaldy. Búgingi tańda memlekettik energetıkalyq reestrdiń sýbektisinde 20 myńnan astam uıym men kásiporyn bar», - dedi Baýyrjan Smaǵulov elordada ótip jatqan halyqaralyq energııa únemdeý forýmynda.

Onyń aıtýynsha, bıýdjettik ǵımarattardyń energetıkalyq resýrsty tutyný kóleminiń ósýine baılanysty qoldanystaǵy zańnamaǵa ózgertýler engizildi.

«2023 jyldan bastap memlekettik energetıkalyq reestr sýbektileriniń sany 40 myńǵa deıin jetedi. Búginde memlekettik energetıkalyq reestr - 10 jyldyq retrospektıvasy bar tolyq avtomattandyrylǵan derekter júıesi. Basqasha aıtqanda BIG DATA. Reestr sýbektileri energııa únemdeý sharalaryn iske asyrý boıynsha 350 mlrd teńgeden astam ınvestıtsııa quıdy. Sonyń nátıjesinde shamamen 88 mlrd teńge únemdeldi», - deıdi ol.

Atalǵan sharada belgili bolǵandaı energııa únemdeý salasynda BUU Damý baǵdarlamasynyń úsh jobasy iske aspaq.