Kelesi jyly Qazaqstanda ər gektar úshin beriletin sýbsıdııa joıylady - A.Mamytbekov

ASTANA. QazAqparat - Kelesi jyldan bastap ər gektar úshin beriletin ósimdik sharýashylyǵyndaǵy sýbsıdııalar joıylady, esesine, ınvestıtsııalyq sýbsıdııalar men ǵylym baǵytyndaǵy sýbsıdııalar bóline bastaıdy. Bul týraly búgin Ortalyq kommýnıkatsııalar qyzmetinde ótken brıfıngte QR Aýyl sharýashylyǵy mınıstri Asyljan Mamytbekov məlim etti.

Mınıstr məlim etkendeı, 2017 jyldan bastap mal sharýashylyǵynda ónimniń lıtrine, kelisine, ər jumyrtqaǵa berilip jatqan sýbsıdııalar da ózgerip, ornyna tehnıka men nesıe paıyzdaryn qoldaıtyn sýbsıdııalar paıda bolady. Qazirgi memlekettik qoldaý sharalary tıimsiz bolyp otyrǵan soń, mınıstrlik osy qadamǵa barýǵa məjbúr bolyp otyr. "Avstralııanyń Kerns degen qalasynda 1986 jyly 19 el toptasqan odaq qurylǵan. Sol elderdiń təjirıbesin zertteı kele, kózimiz jetkeni, olar ózindik qunyn burmalamaıtyn sýbsıdııalardy azaıtyp, kerisinshe, jalpy sıpattaǵy sýbsıdııalardy, ınfraqurylymdy qoldaıtyn sýbsıdııalardy, nesıelerdiń paıyzyn azaıtatyn ınvestıtsııalyq sýbsıdııalardy, ǵylym men konsýltatsııalardy kóbeıtýdiń arqasynda úlken jetistikterge jetti. Osy toptyń ishinde Avstralııa, Jańa Zelandııa, Argentına, Brazılııa sııaqty aýyl sharýashylyǵy salasynda úlken jetistikterge jetken elder bar. Biz ishki jaǵdaıymyzdy zertteıtin bolsaq, beriletin sýbsıdııalardyń kóbi eshqandaı yntalandyrý maqsatyn kózdemeıtinin jəne sýbsıdııa kúndelikti qarajatqa ketip qalatynyn kórip otyrmyz. Bul jaǵdaı bizdiń aýyl sharýashylyǵy salasyndaǵy tehnıkanyń jetispeýshiligine, tehnologııalardyń múlde qoldanylmaýyna əkep soqty. Óıtkeni, tehnıka alaıyn dese, qarapaıym sharýalardyń qarajaty joq, bankke nemese lızıngtik kompanııaǵa beretin kepildigi joq. Eger, alatyn bolsa, ústemdik paıyzy óte joǵary bolady. Sondyqtan da, biz óńirlermen, bıznes ókilderimen aqyldasa kele, ər gektar úshin beriletin ósimdik sharýashylyǵyndaǵy sýbsıdııalady kelesi jyldan bastap joqqa shyǵaryp, onyń ornyna ınvestıtsııalyq sýbsıdııalar men ǵylym baǵytyndaǵy sýbsıdııa bólý týraly sheshim qabyldadyq",- dedi A.Mamytbekov. Bul rette, vedomstvo basshysy habarlaǵandaı, tyńaıtqysh, tuqym satyp alýǵa beriletin sýbsıdııalar qalady. "Al 2017 jyldan bastap mal sharýashylyǵynda lıtrine, kelisine, ər jumyrtqaǵa berilip jatqan sýbsıdııalardy da ózgertip, kerisinshe, tehnıka satyp alýǵa beriletin sýbsıdııalarǵa bet buramyz. Osyndaı qoldaý sharalaryn Úkimetke usyndyq, keshe qoldaý taptyq. Endi kelesi jyldyń bıýdjetine tıisti ózgerister engizemiz", - dep atap ótti Aýyl sharýashylyǵy mınıstri.