Kelesi jyly Qazaqstanda fýtboldan qyzdar arasynda týrnır ótkizý josparlanýda
ASTANA. QazAqparat - Bilim jáne ǵylym mınıstrligi balalar men jasóspirimderdiń tárbıesi baǵytynda kelesi jyly qyzdar arasynda fýtboldan «Teńbil dop» týrnırin ótkizýdi josparlap otyr. Bul týraly búgin Qazaqstan Fýtbol federatsııasynda ótken baspasóz máslıhatynda QR Bilim jáne ǵylym mınıstrligi jastar saıasaty departamentiniń dırektory Roza Káribjanova málim etti.
Aldymen, bıyl 10-shy maýsymyn ótkizetin «Coca-Cola Bylǵary dop» jobasyna qatysty oıyn aıtqan ol bul naǵyz memlekettik-jekemenshik áriptestiktiń nátıjesi ekenin atap ótti. Esterińizge sala keteıik, Qazaqstan Fýtbol federatsııasy men «Coca-Cola» kompanııasy 10 jyldan beri jasóspirimder men balalar arasyndaǵy buqaralyq fýtboldy damytý maqsatynda «Coca-Cola Bylǵary dop» jobasyn júzege asyryp keledi. «Bul joba («Coca-Cola Bylǵary dop» - agenttik) memlekettik-jekemenshik áriptestiktiń tamasha kórinisi dep oılaımyn. Jyl saıyn osy týrnırge qatysatyn 400 myń balanyń arasynan talantty fýtbolshylar tárbıelenip jatqany anyq. Jalpy, Bilim jáne ǵylym mınıstrligi bul jobany tolyqtaı qoldaıdy. Ári qaraıǵy damýyna óz kómegin tıgize bermek»,- deıdi R.Káribjanova. Bilim mınıstrliginiń ókili taǵy bir jańalyq taratty. Kelesi jyldan bastap Qazaqstanda fýtboldan qyzdar arasyndaǵy «Teńbil dop» týrnıri bastalady. «Dene shynyqtyrý jónindegi ǵylymı-tájirıbelik ortalyq habarlap otyrǵandaı, kelesi jyly fýtbolǵa qyz balalar da qatysady. Qyzdar arasyndaǵy fýtboldy da damytamyz. Jarysty «Teńbil dop» dep ataımyz dep otyrmyz. Bul ázirge bastama ǵana. Qansha komanda qatysýǵa ótinish beretinin baıqaımyz, degenmen, qyzyǵýshylyq bar ekenin atap óteıin. Qyzyǵýshylyq bolǵandyqtan da, qyzdar arasyndaǵy fýtboldan osyndaı bastama kóterdik. Bastamanyń keleshegi, qatysýshylardyń qansha bolatyny ýaqyt enshisinde», - deıdi R.Káribjanova. Esterińizge sala keteıik, jasóspirimder men balalar arasyndaǵy «Coca-Cola Bylǵary dop» fýtbol týrnıriniń mereıtoıly 10-shy maýsymynda jeńgen fýtbol komandasy Frantsııada ótetin 2016 jylǵy fýtboldan Eýropa chempıonatynyń fınalyn tamashalaýǵa múmkindik alady.
