Kelesi jyly Qazaqstanda chektermen birge lotereıa berile bastaıdy
ASTANA. QazAqparat - Kelesi jyly Qazaqstanda chektermen birge lotereıa berile bastaıdy. Osylaısha dúkennen taýar satyp alǵan árbir tutynýshy avtomatty túrde lotereıa oıynshysyna aınala alady. Bul týraly búgin Astanada ınvestıtsııalyq Ombýdsmen qyzmetine arnalǵan dóńgelek ústelde Memlekettik kirister komıtetiniń tóraǵasy Dáýlet Erǵojın málim etti.
Onyń aıtýynsha, mundaı júıe kóptegen damyǵan elderde bar jáne ol adamdardyń qolma-qol aqshasyz esep aıyrysýǵa, sonymen qatar satýshydan chek talap etýge yntalandyrady.
«Jaqynda Qazaqstanda pos-termınaldar arqyly esep aıyrysý júıesi engiziledi. Bir jyldan soń, chekterge qosa lotereıa bere bastaıtyn shyǵarmyz. Qazirgi ýaqytta malaızııalyq tarappen kelissózder júrýde, kassalyq chekter men lotereıany yqpaldastyrýdyń joldaryn izdep jatyrmyz. Árbir tutynýshy chekter alǵan saıyn avtomatty túrde lotereıa oıynshysy atanady», - dep atap ótti tóraǵa.
Dáýlet Erǵojınniń atap kórsetkenindeı, qazirgi ýaqytta lotereıalar qolǵa berilýde.
«Jyl sońynda kólik pen qundy zattar oınatylady. Osy jappaı sharaǵa qatysýǵa shaqyramyz. Eń basty maqsat - qolma-qol aqshadan maksımaldy alystaý. Biz osy turǵyda Ońtústik Koreıadaǵy áriptesterimizdiń tájirıbesin alamyz. Ol jaqta tranzaktsııalyq operatsııalardyń 97 paıyzy qolma-qol aqshasyz jasalady. Biz de esep aıyrysýdyń jańa túrlerine aýysa berýimiz kerek, bank kartochkalarynan arylyp, bolashaqta NFS texnologııalaryna (smartfon arqyly esep aıyrysý) kóshýimiz qajet», - dep túıdi sózin komıtet basshysy.
