Kelesi jyly ınformatıka páni 1-synyptan oqytylady - mınıstrlik

 ASTANA. QazAqparat - 2019 jyldan bastap ınformatıka páni 1-synyptan oqytylady. Bul týraly búgin QR Parlamenti Senatyndaǵy Úkimet saǵatynda Bilim jáne ǵylym vıtse-mınıstri Elmıra Sýhanberdıeva aıtty, dep habarlaıdy QazAqparat tilshisi.

«2017-2019 jyldary barlyq mektepti keń jolaqty ınternetke tegin qosýǵa  qarjy qarastyrylǵan. Bul rette keıbir óńirlerde mektepterdiń kabeldik ınternetke qosylmaýyna baılanysty 2017 jyly 2756 mektep, 2018 jyly 460 mektep spýtnık baılanysy arqyly ınternetpen qamtamasyz etildi. Bilim berýdi tsıfrlandyrý aıasynda mektepterdiń 95 paıyzy ınternetke qosylatyn bolady», - dedi ol.

Onyń sózine qaraǵanda, Oqýshylar saraılary men  3 myń mektepte robototehnıka boıynsha elektıvti kýrstar engizildi. Robototehnıka kabınetterin jabdyqtaý boıynsha sharalar qabyldanyp jatyr. 

«Bıyl ınformatıka páni 3-synyptan bastaldy. «Tsıfrlyq Qazaqstan» baǵdarlamasy aıasynda ınformatıka sabaǵy kelesi jyldan bastap 1-synyptan oqytylady. Olardyń baǵdarlamasy daıyndalyp jatyr. Sonymen qatar barlyq óńirde 21 ІT-lıtseı ashyldy»,- dedi Elmıra Sýhanberdıeva.

Eske salaıyq, Astanada ótken «Digital Bridge» halyqaralyq ınnovatsııalyq forýmynda QR Premer-Mınıstri Baqytjan Saǵyntaev ınformatıka páni 1-synyptan bastap oqytylýy múmkindigin aıtqan bolatyn.