Kelesi jyly eń tómengi zeınetaqy ómir súrý mınımýmynan eki esege artady
ASTANA. QazAqparat - Búgin Qaraǵandy qalasyndaǵy «Nur Otan» partııasynyń ǵımaratynda QR Eńbek jáne halyqty áleýmettik qorǵaý mınıstri Tamara Dúısenovamen beıne-konferentsııa ótti, dep habarlaıdy QazAqparat Qaraǵandy oblysy ákimdigine silteme jasap.
Vedomstvo basshysy Pavlodar, Qaraǵandy, Qostanaı jáne Soltústik Qazaqstan oblystarynyń eńbek ardagerleriniń saýaldaryna jaýap berdi.
Qaraǵandylyq Dmıtrıı Makarovıch Boıko elimizdegi mınımaldy zeınetaqynyń mólsherin arttyrý máselesin kóterip, óziniń esepteýlerin usyndy.
«Bizde zeınetkerlerdiń úshten bir bóligi mınımaldy zeınetaqy alady. Al eger 44 000 teńge alatyndardy esepke alar bolsaq, elimizdegi barlyq zeınetkerlerdiń 45% bolady. Sońǵy jyldarda zeınetaqy dollarǵa shaqqanda 80%-ǵa «aryqtap» qaldy. Biryńǵaı jınaqtaýshy zeınetaqy qorynda ortasha eseppen alǵanda árbir shotta 860 000 teńge jatyr. Eger zeınetkerlerdiń zeınetke shyqqan soń 12 jyldaı ómir súretinin eskersek, jylyna 72 500 teńgeden, aıyna 6 000, al kúnine 200 teńgeden shyǵýy tıis», - dedi Dmıtrıı Boıko.
Óz kezeginde Tamara Dúısenova Biryńǵaı jınaqtaýshy zeınetaqy qoryndaǵy salymdardyń jalpy somasynan qazaqstandyqtardyń jınaǵynyń ortasha somasyn esepteý durys emestigin atap ótti. Sebebi keı salymshylar qorǵa 1998-shi jyldan bastap tirkelse, keıbiri endi ǵana tirkelgen.
«Sondyqtan árkimniń salym kólemi ártúrli bolady. Jáne odan ortasha somany esepteý durys emes. Biraq men salym mólsherleri az ekenimen kelisemin. Oǵan sebep - bizdiń elimizde jalaqy joǵary emes. Alaıda biz ony ulǵaıtýǵa birtindep qadam basyp kelemiz», - dedi Tamara Dúısenova.
Mınıstr sondaı-aq aldaǵy ýaqytta zeınetaqy mólsheriniń artatyny týraly da aıtty. Kelesi jyldan bastap, 1998-shi jyly zeınetke shyqqandar, sonymen qatar tolyq eńbek ótili barlar, bazalyq zeınetaqy retinde qazir tólenip otyrǵan 14 000 teńgeniń ornyna 28 000 teńge alatyn bolady. Osylaısha zeınetaqy somasy eńbek ótiline jáne jalaqy mólsherine baılanysty ómir súrý mınımýmynan eki nemese odan kóp ese artyq bolady.
