Kelesi jyly elordada 1 myń 200 oryndyq jańa opera jáne balet teatryn salý josparlanýda
ASTANA. Jeltoqsannyń 21-i. QazAqparat /Qanat Mámetqazyuly/ - Kelesi jyly elordada zaman talabyna saı, jańa opera jáne balet teatryn salý josparlanýda. Bul týraly búgin QR Parlamenti Májilisinde ótken Úkimet saǵatynda Mádenıet jáne aqparat mınıstri Muhtar Qul-Muhammed málim etti,
dep habarlaıdy QazAqparat.
«Q. Qýanyshbaev atyndaǵy Qazaq memlekettik mýzykalyq drama teatry da K. Baıseıitova atyndaǵy opera jáne balet teatry da bir kezderi temirjolshylardyń mádenıet úıi bolǵan kóne ǵımaratta otyr. Bir qýantatyn jaıt bar. Jaqynda ǵana «Qazaqstan» Ortalyq kınokontsert zaly ashylǵan kezde Memleket basshysynyń nazaryna elordada jańadan salynatyn opera jáne balet teatrynyń birneshe jobalary usynyldy. Soǵan sáıkes, kelesi jyldyń kókteminen bastap Astana qalasynda jańadan, zaman talabyna saı 1 myń 200 oryndyq opera jáne balet teatryn salý jóninde tapsyrma berildi. Onyń merzimi de anyqtaldy. Osy teatr salynatyn bolsa, búgingi K. Baıseıitova atyndaǵy opera jáne balet teatry sonda kóshedi. Al Q. Qýanyshbaev atyndaǵy teatrdy sol bosaǵan opera teatry ǵımaratyna ornalastyrsaq ta bolady. Biraq, bul aldaǵy kúngi josparlar», dedi M. Qul-Muhammed.
Sonymen birge, mınıstr atalǵan jospar iske asqan jaǵdaıda Q. Qýanyshbaev atyndaǵy teatrǵa respýblıkalyq mártebe berip, ony mınıstrliktiń qaramaǵyna alýdy qoldaıtyndyǵyn jetkizdi.
